Jol erejesin buzatyn júrgizýshiler mobıldik qosymsha arqyly anyqtalady

NUR-SULTAN. QazAqparat – Qazaqstanda jol erejesin jıi buzatyn júrgizýshiler mobıldik qosymshanyń kómegimen anyqtalatyn bolady. Bul týraly QR Іshki ister mınıstrligi baspasóz qyzmetiniń ókili Shuǵyla Turlybek málim etti, dep habarlaıdy QazAqparat tilshisi.

«Jol qozǵalysyn avtomatty qadaǵalaýdyń tıimdiligin arttyrý úshin Іshki ister mınıstriniń tapsyrmasy boıynsha «Qorǵaý – qaýipti júrgizýshi» mobıldik qosymshasy jasaldy. Onda «Sergek» júıesi kameralary men ІІM jedel basqarý ortalyqtary qyzmetiniń múmkindikteri biriktirilgen. Mobıldik qosymshaǵa kelip túsken málimetter dereý polıtsııa qyzmetkerleriniń planshetterine túsedi. Bul jol qozǵalysyn buzǵan avtomobılderdi naqty ýaqyt rejıminde anyqtaýǵa múmkindik beredi», - dedi Shuǵyla Turlybek mınıstrlikte ótken baspasóz máslıhatynda.

Onyń aıtýynsha, atalǵan qosymshanyń kómegimen jalǵan memlekettik nómirli avtomobılderdi, tehnıkalyq baıqaýdan ótpegen jáne saqtandyrý polısi joq kólik ıelerin anyqtaýǵa bolady.

Sondaı-aq ákimshilik aıyppuldardy tólemeı júrgen kólik ıelerin tabýǵa bolady.

«Polıtsııa qyzmetkeri júıe arqyly 10 mınýttiń ishinde 2 nemese odan kóp zańdy buzǵan «qaýipti júrgizýshi» týraly aqparat alyp, dereý shara qabyldaıdy. Mobıldik qosymsha bıyl 19 sáýirden bastap Shymkentte, 25 sáýirden bastap Almaty men Nur-Sultanda engizildi. Atalǵan qalalarda júıe jumys istegen sátten bastap jol qozǵalysy salasynda 26 myńnan astam ákimshilik quqyq buzýshylyq anyqtaldy. Sonymen qatar 1 078 avtokólik ustalyp, aıyp turaǵyna jetkizildi», - deıdi ol.

Mınıstrlik ókili qazirgi ýaqytta jańashyldyqtyń Óskemen jáne Atyraý qalasynda engizilgenin aıtyp ótti.

«Mysaly, Nur-Sultanda reseılik nómiri bar VAZ 2114 avtokóligi ustaldy, oǵan 4 mıllıon teńgeden astam somaǵa aıyppul salyndy. Shymkent qalasy boıynsha sheteldik tirkeýi bar 1041 avtomobıl ustaldy, olar 4033 ret jol qozǵalysy erejesin buzǵan», - deıdi Sh. Turlybek.