Jol erejelerin qasaqana buzǵandarǵa aıyppul mólsherin eselep arttyrý qajet — Úkimet basshysy
ASTANA. KAZINFORM — Jol erejelerin qasaqana buzýshylarǵa qatysty tásilderdi qaıta qaraý kerek. Bul týraly Úkimet otyrysynda Premer-mınıstr Oljas Bektenov aıtty.
— Jańa Konstıtýtsııada Zań men Tártip qaǵıdaty negizgi qundylyqtardyń biri retinde bekitildi. Zań normalary men erejelerdi qatań saqtaý — árbir azamattyń mindeti. Jol qaýipsizdigi Memleket basshysynyń árdaıym erekshe nazarynda. Adamnyń ómiri men densaýlyǵy jol ústindegi minez-qulyq mádenıetine tikeleı baılanysty. Jalpy alǵanda bıyl jol-kólik oqıǵalarynyń sany tómendedi. Eldi mekendermen qatar, olardan tys kúre joldarda da oń dınamıka baıqalyp otyr. Qaza tapqandar men jaraqat alǵandar sany azaıdy. Munyń barlyǵy júrgizilip jatqan aldyn alý jumystarynyń nátıjesi ekenin atap ótkim keledi, — dedi Úkimet basshysy.
Premer-mınıstrdiń atap ótýinshe, jol qozǵalysy qaýipsizdigin arttyrýǵa baǵyttalǵan birqatar zańnamalyq normalar qabyldandy. Jol erejelerin buzǵany úshin qylmystyq jáne ákimshilik jaýapkershilik kúsheıtildi. Samokattar men skýterlerdi paıdalaný, kólik júrgizýshilerin daıarlaý jáne jasyryn patrýldeý tártibi retke keltirildi. Intellektýaldy júıeler engizilip jatyr.
— Qazirgi tańda elimizdiń joldaryndaǵy qaýipsizdikti 30 myńnan astam kamera qadaǵalaıdy. Jalpy, ahýaldyń jaqsarǵanyna qaramastan, elimizde jol apattarynyń deńgeıi joǵary kúıinde qalyp otyr. Kólik júrgizýshileri tıisti erejeler men talaptarǵa jáne jol qozǵalysy mádenıetine nemquraıly qaraıdy. Qoǵamdyq kólikke arnalǵan jolaqpen júretin, qos tutas syzyqty kesip ótip, qarsy baǵytqa shyǵyp ketetin, sondaı-aq jyldamdyqty shamadan tys asyratyn jaýapsyz júrgizýshiler de bar. Mundaı faktilerge mindetti túrde tosqaýyl qoıyp, tıisti sharalar qabyldaý qajet. Jalpy, jol erejelerin qasaqana buzýshylarǵa qatysty tásilderdi qaıta qaraý kerek. Mundaı adamdarǵa aıyppul tóleý kezinde jeńildikter berilmeýge tıis. Kerisinshe, buzýshylyqtar sanyna qaraı aıyppul mólsherin eselep arttyrý qajet. Іshki ister mınıstrligi kóptegen elde tıimdi qoldanylyp júrgen baldyq júıeni engizý tájirıbesin zerdelep, ony elimizde iske qosýǵa tıis. Bizdiń ortaq mindetimiz — joldardaǵy qaýipsizdikti qamtamasyz etý, kólik apattaryn turaqty túrde tómendetý jáne adam ólimin azaıtý, — dedi Oljas Bektenov.
Buǵan deıin jol erejesin óreskel buzatyndar júrgizýshi kýáliginen 1 jylǵa aıyrylýy múmkin ekenin jazǵan edik.
