Jol boıyndaǵy janjal: Eregeskenniń biri «tapansha» shyǵarǵan

ALMATY. QazAqparat – Almatyda Ál-Farabı dańǵyly boıynda kólik júrgizýshileriniń sózge kelispeı qalǵan vıdeosy jelige tarady, dep habarlaıdy QazAqparat tilshisi.

Vıdeo avtorynyń aıtýynsha, eregeskenderdiń birinde tapansha bolǵan.

«Úsheýi de saý bolǵan joq, olardyń biri rýlde otyrdy. Bizdiń jolymyzdy kesip, toqtatyp aldy, sóıtip joldasyma jabyldy. Biz Bostandyq aýdandyq polıtsııa basqarmasyna aryz jazdyq», - dep jazylǵan posta.

Almaty qalalyq Polıtsııa departamentiniń málimetinshe, oqıǵa 8 mamyrda túngi saǵat 02.30-da bolǵan.

«Toyota Alphard» markaly kólikti jol-patrýldik polıtsııa qyzmetkerleri «Ustaý» jospary boıynsha ustaǵan.

«Jol boıynda eki kólik júrgizýshisiniń arasynda janjal týyndaǵany belgili boldy. Olardyń biri tapansha kórsetken, onyń oıynshyq ekeni anyqtaldy. Oqıǵaǵa qatysýshylardyń ekeýi de aryz jazdy. Tıisti saraptamalar taǵaıyndaldy, nátıjesi boıynsha sheshim qabyldanatyn bolady», - dep habarlady polıtsııada.