Jol boıyndaǵy qyzmet kórsetý nysandaryna jer berý rásimi jeńildetiledi

ASTANA. QazAqparat – Indýstrııa jáne ınfraqurylymdyq damý mınıstrligi Avtomobıl joldary komıteti tóraǵasynyń orynbasary Amangeldi Bekov jol boıyndaǵy qyzmet kórsetý nysandaryn damytý jumystary jaıynda aıtyp berdi, dep habarlaıdy QazAqparat tilshisi.

«Qazirgi kezde respýblıkalyq mańyzy bar avtomobıl joldarynyń boıynda 1 634 nysan bar. Sonyń 74 paıyzy Ulttyq standart talaptaryna saı keledi», - dedi A. Bekov Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, bıyl taǵy 78 qyzmet kórsetý nysanyn iske qosý josparlanǵan. Onyń 53 obektisi jeke ınvestıtsııalardy tartý esebinen qoıylmaq.

«Bul baǵyttaǵy jumystar aıasynda bıyl ulttyq standart talaptaryna sáıkes keletin qyzmet kórsetý nysandarynyń úlesin 82 paıyzǵa deıin jetkizýge múmkindik bolady. Jol boıyndaǵy qyzmet kórsetý nysandaryn damytý maqsatynda byltyr jergilikti atqarýshy organdardan 10% mólsherinde sýbsıdııalar qarastyrylǵan. Sondaı-aq, sanıtarlyq-gıgıenalyq toraptardy kútip ustaýǵa aıyna 83 myń teńge kóleminde shyǵyndardy óteý boıynsha memlekettik qoldaý tetigi iske qosyldy. Sonymen qatar, jol boıyndaǵy qyzmet kórsetý nysandaryn salý úshin jer berý rásimin jeńildetý maqsatynda biz qoldanystaǵy zańnamaǵa ózgerister engizý máselesin pysyqtap jatyrmyz», - dedi komıtet ókili.

Budan buryn habarlanǵandaı, 2023 jyldyń qorytyndysy boıynsha normatıvtik jaǵdaıdaǵy joldardyń úlesi respýblıkalyq jeli boıynsha 92 paıyzǵa jáne jergilikti jeli boıynsha 87 paıyzǵa deıin jetkizilmek.

Jyl aıaǵyna deıin «Ortalyq – Ońtústik» dálizi boıynsha jol ýchaskeleri ashylady.