Jol boıyndaǵy qyzmet kórsetý nysandary qurylysyna ákimder nazar aýdarǵan jón - Á. Isekeshev
ASTANA. QazAqparat - Búgin Úkimet otyrysynda QR Investıtsııalar jáne damý mınıstri Áset Isekeshev jol boıyndaǵy qyzmet kórsetý nysandarynyń qurylysyna oblystar nazar aýdarý kerektigin aıtty.
«Búginde úsh sanat boıynsha jikteletin jol boıyndaǵy qyzmet kórsetý nysandarynyń standarttary bekitildi. Osylaısha, standarttarǵa sáıkes, ár 50 shaqyrym saıyn úshinshi sanattaǵy nysan salyný kerek, ár 200 km saıyn ekinshi sanatty, sondaı-aq týrıstik nemese tarıhı jerlerde birinshi sanatty nysandar ornalasýy tıis. Onda birneshe kúnge toqtaý úshin paıdalanýshylarǵa jaǵdaı jasalatyn bolady»,-dedi Á. Isekeshev.
Belgili bolǵandaı, 2014 jáne 2015 jyldary jol boıyndaǵy qyzmet kórsetý nysandaryna jáne onyń qyzmetteriniń ulttyq standarttaryna sáıkes, 28 qyzmet kórsetý nysandary paıdalanýǵa berildi.
«Bizge 200-ge tarta nysan salý qajet. Sondyqtan oblys ákimderiniń nazaryn jol boıynda sapaly qyzmet kórsetý oryndaryn qamtamasyz etý máselesine aýdarǵym keledi. Keıbir óńirde bul jumystar belsendi júrgizilip otyrǵan joq»,-dedi Á. Isekeshev.
