Jol boıyndaǵy gúldi kóligimen basqan BMW júrgizýshisi jaýapkershilikke tartylady

TALDYQORǴAN. QazAqparat – Jetisý oblysynyń aýmaǵyndaǵy respýblıkalyq tas jol boıynda ósken gúldi kóligimen basyp, ersi áreket jasaǵan er adam jaýapkershilikke tartylady, dep habarlaıdy QazAqparat tilshisi.

«Beınejazbadaǵy BMW avtokóliginiń ıesi Kerbulaq aýdanynyń 34 jastaǵy turǵyny ekenin habarlaımyz. Júrgizýshiniń is-áreketinde QR ÁQBtK-niń 386-babynda (Jasyl ekpelerdi kútip-ustaý jáne qorǵaý qaǵıdalaryn buzý) kózdelgen buzýshylyq qarastyrylǵan. Belgili bolǵandaı, er adam qazirgi ýaqytta jumys babymen issaparda. Qaıtyp kelgennen keıin ol qoldanystaǵy ákimshilik zańnamaǵa sáıkes jaýapkershilikke tartylady. Іs baqylaýǵa alyndy», – delingen Jetisý oblystyq polıtsııa departamenti baspasóz qyzmetiniń habarlamasynda.

Aıta keteıik, buǵan deıin áleýmettik jelide er adam jol boıyn jaǵalaı ósken gúldi kóligimen basyp ótkeni túsirilgen beınejazba tarady. Bul kórinis jeli qoldanýshylardyń narazylyǵyn týdyrǵan bolatyn.