Jol boıynda tóbelesken avtobýs júrgizýshisi polıtsııa bólimine shaqyryldy - Astana
ASTANA. QazAqparat - Elordada, Máńgilik el kóshesi boıyndaǵy tóbeleske qatysy bar №70 avtobýstyń júrgizýshisi men kondýktory Esil aýdandyq ishki ister bólimine shaqyryldy. Bul jaıynda qalalyq ákimdiktiń baspasóz qyzmetinen málim etti, dep habarlaıdy QazAqparat.
«Kóliktik baqylaý qyzmeti tarapynan bul oqıǵaǵa qatysty mán-jaıdy anyqtaý jumystary júrgizildi. №6 «Jorǵa MT» avtobýs parkine tıesili memlekettik kómiri 2631 DE №70 baǵdarlyq avtobýstyń júrgizýshi Q.Qalbekov pen kondýktor S.Orynbekov túsinikteme alý úshin shaqyryldy», - delingen habarlamada.
Júrgizýshiniń aıtýynsha, 1 aqpan kúni saǵat 20,15-te Máńgilik el kóshesimen kele jatqanda Nissan Terrano markaly kólik jolyn óreskel qıyp apatty jaǵdaı týyndatqan. Osy kezde tejegishti birden basyp qalǵan avtobýs júrgizýshisine jolaýshylar narazylyq tanytqan.
«Q.Qalbekov Nissan Terrano avtomobılin basyp ozyp, aldynan oraǵytyp toqtaǵan jáne avtobýstan shyǵyp, jol talǵamaıtyn kólikke barǵan. Nissan Terrano kóliginiń rýlinde otyrǵan áıel adam Q.Qalbekovpen daýlasa ketken. Osy kezde áıeldiń janynda otyrǵan jolaýshy daýǵa aralasqan. Qalbekovtiń aıtýynsha, ol daýǵa aralasqan adamdy ıterip jibergen. Al ol Qabylbekovtiń betin bir soqqan. Sodan tóbeles bastalǵan», - deıdi Kóliktiń baqylaý qyzmetinen.
Jol jalǵamaıtyn kóliktiń júrgizýshisi men onyń jolaýshysy ózderiniń apatty jaǵdaı týyndatqandyqtaryn moıyndap, avtobýs júrgizýshisinen keshirim suraǵan. Muny №6 avtobýs parkiniń kondýktory Orynbekov te óziniń túsiniktemesinde atap ótken.
«Nissan Terrano markaly kóliktiń júrgizýshisi men jolaýshysy týraly aqparat bolmaǵandyqtan oqıǵanyń mán-jaıyn tolyqtaı ashý múmkin bolmaı otyr. Degenmen, oqıǵanyń mán-jaıyn anyqtaý úshin jáne júrgizýshi Qabylbekov pen kondýktor Orynbekovtyń tarapynan óreskel qatelikter jiberilgendigin eskerip, jumystan shettetildi jáne tártiptik jazaǵa tartylatyn bolady», - dep habarlady ákimdikten.
Sondaı-aq taratylǵan aqparatta atalǵan oqıǵaǵa baılanysy avtobýs júrgizýshisi men kondýktordyń Esil aýdandyq ishki ister bólimine jaýap alýǵa shaqyrylǵandyǵy aıtylǵan.
Aıta keteıik, elordanyń Máńgilik el kóshesi boıyndaǵy qoǵamdyq avtobýs pen jol talǵamaıtyn kólik júrgizýshileriniń tóbelesine baılanysty qalalyq ishki ister departamentitergeý amaldaryn júrgizip jatqandyǵyn buǵan deıin habarlaǵan bolatynbyz.
