Jol boıynda qandaı bıznes ashýǵa bolady
Atap aıtqanda, Taraz, Shymkent jáne Qyzylorda qalalary arasynda júrgizýshiler men jolaýshylar demalatyn 46 alań bar. Olardyń 12-ine jeke kásibin ashýǵa nıetti kásipkerlerden ótinimder kelip tústi. Al qalǵan 34-i jol boıynan shaǵyn bıznes ashqysy keletin áleýetti ınvestorlar úshin daıyn.
«Úshinshi megapolıste Taraz-Shymkent jáne Shymkent-Qyzylorda jol ýchaskelerine aqyly júıeni engizý máseleleri boıynsha qoǵamdyq tyńdaý ótti. Buǵan deıin mundaı tyńdaýlar Jambyl jáne Túrkistan oblystarynyń Baızaq, Jambyl, Jýaly, Túlkibas jáne Saıram aýdandarynyń turǵyndarymen bolǵan kezdesýlerde talqylanǵan edi. Jıyndarda jergilikti turǵyndar jabdyqtalmaǵan dárethanalardy, aqyly avtojoldardaǵy servısti damytý máselelerin kótergendikten, «QazAvtoJol» UK» AQ ókilderi Taraz-Shymkent jáne Shymkent-Qyzylorda ýchaskeleri «Batys Qytaı – Batys Eýropa» transqurlyqtyq kólik dáliziniń bóligi jáne úlken tranzıttik áleýetke ıe ekenin atap ótti. Jaqyn arada munda kólik aǵyny birneshe ese artady. Tıisinshe, janar-jaǵarmaı quıý beketterine, qonaq úı, dámhanalar, tehnıkalyq qyzmet kórsetý stansalaryna suranys artady», - delingen habarlamada.
Sondyqtan «QazAvtoJol» qazirdiń ózinde aqyly joldardyń servısin damytý úshin jaǵdaı jasaýda jáne qoljetimdi sharttarmen jol boıyndaǵy qyzmet kórsetý ári saýda salasynda bıznes bastaǵysy keletin kásipkerlerdi yntymaqtastyqqa shaqyryp otyr.
Qazir Taraz-Shymkent avtojoly ýchaskesinde saıahatshylardyń 12 demalys alańy ornalasqan. Olardyń bireýine áleýetti ınvestor ótinim berdi. Shymkent-Qyzylorda ýchaskesinde 34 alań ornalasqan, olardyń 11-i boıynsha kásipkerlermen «jaýapty saqtaý» boıynsha sharttar jasalǵan. Qalǵan bos alańdarǵa ázirge ótinim túsken joq. Degenmen, «QazAvtoJol» ulttyq kompanııasy áleýetti ınvestorlarǵa óte yńǵaıly jaǵdaılar usynyp otyr.
Aıta keteıik, alańdardy jergilikti kásipkerlerdiń paıdalanýyna basymdyq beriledi.
«Jaýapty saqtaý alańyn alý úshin áleýetti ınvestor «QazAvtoJol» UK» AQ www.qaj.kz saıty arqyly qajet «jol boıyndaǵy servıs» bólimine kirip, nysandar sanatyn tańdap, ótinim qaldyrý kerek. Sondaı-aq, ulttyq kompanııa iri jelilik avtojanarmaı quıý stantsııalarymen kelisimge qol qoıdy, olar respýblıkalyq joldardyń barlyq jelisi boıynsha 2024-jyldyń sońyna deıin janar-jaǵarmaı quıý, tehnıkalyq qyzmet kórsetý stansalaryn, dámhanalar, dúkender, qonaq úıler, jyly dárethanalar men dýshtary bar jol boıyndaǵy 134 zamanaýı keshen salady. Osy kelisimder aıasynda Taraz-Shymkent ýchaskesinde 4, Shymkent-Qyzylorda ýchaskesinde – 8, Shymkent-Tashkent ýchaskesinde 3 jol boıyndaǵy keshen salynady», - dep atalyp ótken kompanııa málimetinde.