Jol boıyndaǵy ashanada uıyqtaǵan qos polıtseı jumystan qýyldy

QYZYLORDA. KAZINFORM – Qyzylordada jol boıyndaǵy ashanada qyzmettik kıimmen uıyqtaǵan qos polıtseı jumystan qýyldy.

Oblystyq sottyń baspasóz qyzmeti habarlaǵandaı, oqıǵa byltyr 23 mamyrda bolǵan. Jergilikti polıtsııa qyzmeti basqarmasy patrýldik polıtsııa rotasynyń burynǵy ınspektorlary «Samara-Shymkent» avtojolynda kezekshilik atqarǵan. Biraq sol kúni áleýmettik jelige jol boıyndaǵy ashana janynda patrýldik polıtsııa rotasynyń qyzmettik kóligi turǵany, ashana ishinde ekeýiniń qyzmettik kıimmen uıyqtap jatqany týraly beınejazba jarııalanǵan. 

— Qyzmettik tergeý qorytyndysyna súıensek, olar qyzmettik mindetine salǵyrt qaraǵan. Kópshilik jerde nysandyq kıimmen uıyqtap, polıtsııa ımıdjine kir keltiretin rezonanstyq beınejazbanyń taralýyna jol bergen. Portatıvti beınejetonǵa kezekshilik barysyn tolyq túsirmeı, negizsiz sóndirip qoıǵan. Polıtsııa qyzmetkerleriniń atyna kir keltiretin áreketi úshin olar ishki ister organdary qatarynan shyǵaryldy, — delingen vedomstvo habarlamasynda. 

Alaıda, burynǵy polıtseıler ózderine tártiptik jaza qoldaný týraly buıryqtyń kúshin joıýdy, burynǵy laýazymyna qaıta ornalastyrýdy surap Qyzylorda qalalyq sotyna júgingen. Sot olardyń talap aryzyn qanaǵattandyrǵan joq. 

Al jyl basynda Oralda sotqa qurmetsizdik tanytqan polıtsııa qyzmetkeri jaýapqa tartyldy.