«Jol boıyna mal óleksesin tastaıdy»: «QazAvtoJol» júrgizýshilerge úndeý jasady
ASTANA. KAZINFORM — «QazAvtoJol» jol paıdalanýshylardy ekologııalyq mádenıetti saqtaýǵa shaqyrdy.
Ulttyq kompanııanyń baspasóz qyzmeti atap ótkendeı, respýblıkalyq mańyzy bar avtomobıl joldary — eldi mekenderdi jalǵaıtyn kúretamyr ǵana emes, kún saıyn myńdaǵan azamat paıdalanatyn ortaq qoǵamdyq keńistik. Sondyqtan jol boıynyń tazalyǵy men tártibi tek jol qyzmetkerleriniń mindeti emes, árbir jol paıdalanýshynyń mádenıeti men jaýapkershiligine tikeleı baılanysty.
Jolshylar kún saıyn respýblıkalyq trassalar boıyndaǵy qoqysty jınap, sanıtarlyq aımaqtardy tazalap, dárethanalar men jol boıy ınfraqurylymyn kútip-ustaý jumystaryn júrgizedi. Bul jumys jyldyń tórt mezgilinde, aptap ystyqta da, qaqaǵan aıazda da, jel men jańbyrda da toqtamaıdy. Alaıda keıbir azamattardyń jaýapsyz áreketi bul eńbektiń qadirin túsirip otyr.
— Jol boıyna qoqys tastaý, belgilenbegen jerde temeki shegý, dárethanalardy maqsatsyz paıdalaný, jol jıegi men demalys aımaqtaryn lastaý — ókinishke qaraı, áli de kezdesetin keleńsiz kórinister. Tipti keıbir turǵyndardyń jol boıyndaǵy qoqys jáshikterine turmystyq qaldyq, qurylys qoqysy, ólgen maldyń óleksesin tastaıtyn jaǵdaılary da tirkeledi. Munyń barlyǵy tek tazalyq máselesi emes. Bul — ekologııalyq mádenıet, qoǵamdyq tártip jáne ortaq múlikke degen kózqaras máselesi. Bireýdiń jaýapsyzdyǵynan jol boıyndaǵy sanıtarlyq jaǵdaı nasharlap, keıin sol jaǵdaıǵa qaıtadan qoǵamnyń ózi shaǵym aıtady, — deıdi «QazAvtoJol» qyzmetkerleri.
Aıta ketý kerek, jol boıyndaǵy tazalyq pen sanıtarlyq nysandardy kútip-ustaýǵa bıýdjetten jyl saıyn mlrd teńgege jýyq qarajat jumsalady.
— Bul qarjy jol qaýipsizdigin arttyrýǵa, ınfraqurylymdy damytýǵa jáne servısti jaqsartýǵa baǵyttalýy múmkin edi. Alaıda onyń edáýir bóligi jaýapsyz adamdar qaldyrǵan qoqysty jınaýǵa ketip otyr. Respýblıkalyq jol — qoqys tógetin oryn emes. Bul — barsha azamatqa ortaq memlekettik ınfraqurylym. Ony taza ustaý — jolshynyń ǵana emes, júrgizýshiniń de, jolaýshynyń da, jergilikti turǵynnyń da ortaq mindeti, — dedi «QazAvtoJol» mamandary.
«QazAvtoJol» ulttyq kompanııasy jol paıdalanýshylardy qarapaıym ekologııalyq mádenıetti saqtaýǵa shaqyrady.
— Qoqys tastamańyz, sanıtarlyq nysandardy uqypty paıdalanyńyz, tabıǵatqa janashyr bolyńyz, jolshylardyń eńbegin jáne memlekettik múlikti qurmetteńiz. Jol boıyndaǵy tazalyq áleýmettik jelidegi shaǵymnan emes, ár adamnyń jeke jaýapkershiliginen bastalady, — dep úndeý jasady vedomstvo.
Buǵan deıin Astanada 55 zańsyz qoqys úıindisi joıylǵanyn jazǵanbyz.
