Jol, bılet jáne ınfraqurylym — Úkimet týrızmdegi negizgi túıtkilderdi kóterdi
ASTANA. KAZINFORM — Eldegi tanymal ári shalǵaıdaǵy týrıstik baǵyttarǵa kólikpen qatynaýdyń qıyndyǵy týraly shaǵym túsip jatyr. Áýe jáne temirjol bıletteriniń tapshylyǵy men baǵasy da alańdaýshylyq týǵyzady. Bul máselelerdi Premer-mınıstr Oljas Bektenov búgingi Úkimet otyrysynda kóterdi.
— Kólik mınıstrligi áýe kompanııalarymen jáne «Qazaqstan temir jolymen» birlesip, demalýshylar úshin qolaıly baǵamen tanymal kýrorttyq baǵyttarǵa reısterdiń jáne oryndar sanyn arttyrý sharalaryn qabyldasyn, — dedi Oljas Bektenov.
Premer-mınıstr ulttyq parkterdi damytý máselelerine toqtaldy. Ekologııa mınıstrligi 10 oblysta ınvestıtsııalyq áleýeti joǵary negizgi ulttyq parkterdi aıqyndaǵan.
— Bul baǵytta parkterdi damytýǵa múddeli ınvestorlar da bar.Barlyq tıisti memlekettik organdar basy artyq bıýrokratııasyz, olardy tez arada júzege asyrý úshin jan-jaqty qoldaý kórsetsin, — dedi ol.
Sonymen birge, týrıstik maýsymnyń qyzǵan shaǵynda qonaqtar toqtaıtyn oryn tapshylyǵy aıqyn sezilip otyrǵany aıtyldy. Kóptegen týrıst arnaıy jabdyqtalmaǵan demalys oryndaryn paıdalanýǵa májbúr.
Óńir ákimdikterine shuǵyl túrde shatyrlar men avtoúılerde kempıngtik demalysqa arnalǵan turaqtardyń nemese alańdardyń tıisti ınfraqurylymyn qamtamasyz etýi tapsyryldy.
— Týrızm salasy qarqyndy damyǵan elderde demalys sapasy jaıly qonaq úılermen nemese áralýan týrıstik baǵyttarmen, ekskýrsııalyq baǵdarlamalarmen ǵana emes, kelýshilerge kúndelikti qyzmet kórsetetin mamandardyń kásibı deńgeıimen de aıqyndalady. Bul jergilikti turǵyndardyń qonaqjaılyq qasıetine de tikeleı baılanysty. Osy oraıda, Týrızm mınıstrligine ákimdiktermen jáne týrıstik kompanııalarmen birge óz jumystarynda demalýshylarǵa kórsetiletin qyzmet sapasyn arttyrýǵa basa nazar aýdarýdy tapsyramyn. Dál osy qyzmet kórsetý sapasy týrıstik salanyń tartymdylyǵyna jáne elimizdiń bedeline tikeleı áser etedi, — dep túıindedi Premer-Mınıstr.
Aıta keteıik, búgin Úkimet týrızmdi damytý máselelerin talqylady.
Buǵan deıin Oljas Bektenov vandalızmge qarsy baqylaýdy kúsheıtýdi tapsyrǵan edi.
