Jol belgilerine qaramaǵan júrgizýshige qatysty ákimshilik is qozǵaldy
KÓKShETAÝ. QazAqparat – Aqmola oblysy aýmaǵynda «Astana-Petropavl» tas jolynda belgilerge qaramaǵan júrgizýshige qatysty ákimshilik is qozǵaldy, dep habarlaıdy QazAqparat tilshisi oblysy PD baspasóz qyzmetine silteme jasap.
Eske sala keteıik, osyǵan deıin habarlaǵanymyzdaı, Kókshetaý qalasy baǵytyndaǵy «Astana-Petropavl» tas jolynda 297 shaqyrymynda «Mıtsýbısı Lantser» avtokóligi sý qubyryn tartý úshin qazylǵan orǵa qulap ketti. Kýágerler oqıǵany vıdeoǵa túsirip, áleýmettik jelige taratqan. Keıin «QazAvtoJol» AQ apatqa qatysty túsinik berdi.
Endi, osy oqıǵaǵa baılanysty Aqmola oblysynyń tártip saqshylary jol qozǵalysy erejesin buzǵan júrgizýshiniń ústinen ákimishilik is qozǵap otyr.
«Kólik júrgizýshisi óziniń kinásin tolyq moıyndady. Qazirgi kezde, jol belgileri talaptaryn oryndamaǵan kólik júrgizýshisiniń ústinen QR ÁQbK 601 babynyń 1 bóligi boıynsha ákimshilik is qozǵaldy»,- dep túsindirdi QazAqparat tilshisiniń saýalyna Aqmola oblystyq PD baspasóz qyzmetindegiler.
Aıta keteıik, «Astana-Petropavl» tas jolynyń atalmysh bóligin jóndeý jumystary 2018 jyly bastalyp, 2020 jyly aıaqtaý josparlanǵan. Jóndeý jumystary júrgizilip jatqan tusta jol erejeleri men jóndeý jumystaryn bildiretin belgiler joldyń eki jaǵynda da qoıylǵan.
