Jol aıryǵy qurylysynyń aqshasy jer ýchaskelerin satyp alýǵa jumsalady - Almaty
ALMATY. QazAqparat - Almaty qalasy Jetisý aýdanynyń ákimi Maqsat Qıqymov Seıfýllın men Jansúgirov qıylysyndaǵy jol aıryǵynyń qurylysy nege toqtap turǵanyn túsindirdi, dep habarlaıdy QazAqparat tilshisi.
Aýdan ákiminiń aıtýynsha, 117 úıdi ıelerinen satyp alýda problema týyndap tur.
Buǵan deıin atalǵan aýdanda turatyn úı ıeleri Baqytjan Saǵyntaevpen kezdesýde birneshe jyldan beri ótemaqy ala almaı jatqanyn aıtyp shaǵymdanǵan edi.
Bul úılerdiń ornyna jospar boıynsha Seıfýllın Jansúgirov jol aıryǵy salynatyn bolǵan edi.
«Bul másele 2-3 jyl qatarynan sheshilip keledi. Turǵyndardy túsinýge bolady. 117 úıdiń ıelerine habarlandyrý kelgen. Olar úılerin ne sata almaıdy, ne basqasyn satyp ala almaı, baılanyp otyr. Qala ákimi bul máseleni óz baqylaýyna aldy. Jol aıryǵyn salýǵa belgilengen qarajatty jer ýchaskelerin satyp alýǵa baǵyttaý sheshildi. Turǵyndarmen máseleni sheshpeı jatyp, jol aıryǵy qurylysyn bastaý qajet emes. 20 qyrkúıekten keıin respýblıkalyq bıýdjet naqtylanady. Sol kezde jer ýchaskelerin satyp alýǵa 3,6 mlrd teńge qarastyrylǵan. Qyrkúıekte bul qarajat maquldansa, 5-10 qazanda shottarǵa aýdarylady. Sondyqtan, 2-3 kúnde jer ýchaskelerin satyp alý protsedýrasyn bastaımyz», - dedi Maqsat Qıqymov.
