Jol apatynda kóz jumǵan qostanaılyq kásibı baıker bolǵan
QOSTANAI. QazAqparat - Qostanaıdaǵy jol-kólik oqıǵasy kezinde qaza tapqan 32 jastaǵy jigit kásibı motoklýbtyń múshesi bolǵan.
Qala ortalyǵynda bolǵan iri jol apatynda kóz jumǵan Evgenıı Pasechnık «Steppe Riders» motoklýbyna byltyr kelgen. Aıta keteıik, 2008 jyly qurylǵan motoklýb sapynda elimizge tanymal baıkerler bar. Solardyń biri, motoshabandoz Aleksandr Sheremettiń aıtýynsha, 32 jastaǵy Evgenıı Pasechnık janarmaı beketinde jumys istegen.
«Ol mototsıklge mingende shlemin tastamaıtyn. Apat bolǵan kúni qyzymen kezdesýge bara jatypty. Evgenıı meniń jaqyn dostarymnyń biri. Ol qarapaıym, minezge baı jigit edi. Bizdiń motoklýb tájirıbeli shabandozdan aıyrylyp qaldy», - dedi A.Sheremet.
Eske salaıyq, keshe túnde Abaı-Pavlov kósheleriniń qıylysynda bolǵan jol kólik apatynda eki kólik soqtyǵysyp, biri mototsıklshini qaǵyp ketken. Baıker oqıǵa ornynda qaza tapty. Al qalǵan kólik júrgizýshileri aýyr halde aýrýhanaǵa jetkizildi.
«26 jastaǵy jigittiń jaǵdaıy qıyn. Túnde ota jasadyq. Qazir jansaqtaý bólimine kóshirildi. Emdeý-dıagnostıkalyq sharalary kezinde aıaq-qol, ish qýysy, ishtiń tuıyq jaraqaty, bas súıektiń synýy anyqtaldy, jalpy ár túrli organdary zardap shekken»,- dedi qalalyq aýrýhananyń bas dárigeri Samat Shúmenbaev.
