Jol apatynda aıaǵynan aırylǵan Ekaterınaǵa Germanııada ota jasaldy
ALMATY. QazAqparat - Jol apaty kesirinen eki aıaǵynan aırylǵan Ekaterına Parafıevaǵa Germanııada ota jasaldy, dep habarlaıdy QazAqparat tilshisi.
Bul týraly ol Feısbýktegi paraqshasynda habarlady.
«Dostar ota sátti ótti. Sol tizemniń astyńǵy bóligin alyp tastaýǵa týra keldi. Jaraıdy, eshteńe etpeıdi, qaıtsem de aıaǵymnan tik turýym kerek! Qoldaý kórsetkenderińizge alǵys aıtamyn. Shetelde emdelýime múmkindik bergenderińiz úshin kóp rahmet», - dedi E.Parafıeva.
Eske sala keteıik, E. Parafıeva 16 maýsymda Almaty qalasyndaǵy ál-Farabı dańǵylynda bolǵan jol apatynan zardap shekken bolatyn. Honda CRV kóligin tizgindegen qyzdar ashyq lıýkke kirip ketip, kólik dóńgelegin jaryp alǵan. Sodan jol shetine toqtap, syrtqa shyǵyp, kólikterin qarap jatqan kezde ortańǵy jolaqta kele jatqan Toyota Camry mashınasyn avtobýs soqqan. Qatty soqqydan Toyota Camry kóliginiń artqy bóligi ushyp kelip Honda CRV kóligine tıgen. Saldarynan qyzdar ortada qysylyp qalyp, bireýi eki aıaǵynan aıyrylǵan bolatyn.
Katıa belgili erikti, jattyqtyrýshy Kıra Ýdartsevanyń kómegimen ońaltý sharalarynan ótti. Endi ol arnaıy jattyǵýlardyń arqasynda protez kııýge daıyndalmaq. Kelinshek qaıyrymdylyq sharalaryna, qoǵamdyq jumystarǵa belsendi aralasýdy bastady.
Qaıyrymdy qazaqstandyqtar Ekaterınanyń emdelýine 17 mln teńge jınap bergen bolatyn.
