Jol apatynan zardap shekken qazaqstandyq qyzǵa Ońtústik Koreıada ota jasaıdy
ASTANA. QazAqparat - Kólik apatynan zardap shekken 23 jastaǵy Madına Sadýovanyń betine plastıkalyq ota jasaıtyn boldy. Qyrkúıek aıynyń basynda ol Ońtústik Koreıaǵa attanady, dep habarlaıdy tvk-uko.kz.
Bir aı buryn tvk-uko.kz arnasynda kólik apatynan betin jaraqattap alǵan Madına Sadýova týraly sıýjet shyǵyp, oǵan áleýmettik jelilerde úlken qoldaý kórsetilgen bolatyn. Sol ýaqytta koreıalyq kosmetıka kompanııasy óziniń «ınstagram» paraqshasynda kórikti bolǵysy keletin qyzdar arasynda saıys uıymdastyryp jatqan edi. Júzdegen ótinishterdiń arasynan uıymdastyrýshylar Madınany tańdady.
«Madınany qazylar alqasy biraýyzdan jeńimpaz dep tańdady. Onyń bar qujattaryn biz Ońtústik Koreıanyń klınıkalaryna jiberdik. Mundaı qıyn otany jasaýǵa táýekel etetin mamandy tabý úshin biraz qınaldyq»,- deıdi koreı kosmetıkalyq ortalyǵynyń dırektory Jaınar Muqataıqyzy.
Ortalyq dırektory qyzǵa sertıfıkatty jeke tabystaý úshin Shymkentke kelgen.
Esterińizge sala keteıik, kólik apatynan Shardara aýdanynyń turǵyny Madına Sadýova denesiniń 35%-in 4 dárejeli kúıik shalǵan. Densaýlyǵyna zııan keltirýmen qatar ol psıhologııalyq úlken soqqy aldy. Kólik apaty kezinde onyń joldasy kóz jumǵan. Koreıada Madınany bir emes, úsh ota men ary qaraı reabılıtatsııalyq kezeń kútip tur. Madına jańa ómir bastaýǵa múmkindik bergen barlyq janashyrlaryna úlken alǵys aıtady.
