Jol apatynan mert bolǵan erli-zaıyptynyń uly 4 jyldan soń dúnıege keldi
ASTANA. QazAqparat - Qytaıda jol apatynan qaza tapqan erli-zaıyptynyń uly 4 jyldan soń týdy. Bul jaıly jergilikti BAQ-qa silteme jasap VVS habarlaıdy.
2013 jyly jasandy uryqtandyrý jolymen bala tabýǵa úmit artqan erli-zaıypty birneshe embrıonyn muzdatyp qoıady. Alaıda kóp ótpeı olar jantúrshigerlik jol apatyna ushyrap, qaza tabady.
Jol apatynan keıin erli-zaıyptynyń ata-analary sottan embrıondardy paıdalaný quqyǵyn alýǵa kóp ýaqyt jumsaýyna týra keldi. Uzaqqa sozylǵan talqylaýlardan soń sot embrıondardy paıdalaný quqyǵyn quda-qudaǵılarǵa - tórt adamǵa berdi.
Jergilikti BAQ-tyń habaryna qaraǵanda, buǵan deıin ata-analar óz balalarynyń embrıondaryn mura etip alǵan jaǵdaı bolmaǵan.
Qytaıda tyıym salynǵandyqtan, ata-ájeler sýrrogat anany zań ruqsat beretin basqa elden - Laostan izdep tapty. Bala sýrrogat ana Qytaıǵa saıahattaǵanda dúnıege keldi, oǵan Tıantıan degen esim qoıyldy.
