Jol apatynan eki aıaǵynan aırylǵan Parafıeva protezben júre bastady
ALMATY. QazAqparat - Jol apatynan eki aıaǵynan aıyrylǵan almatylyq áıel Ekaterına Parafıeva protezben júre bastady, dep habarlaıdy QazAqparat tilshisi.
Bul týraly ol Facebook paraqshasynda jazdy.
Ol óziniń protez kıip, baldaq ustap, tik turǵan sýretin jarııalaǵan.
«Men armandaǵan sýret osy. Aqyryn-aqyryn jańadan tura bastadym. Ázirge qadamdarym senimdi emes, baldaqpen turamyn. Qaz-qaz basyp úırenip jatqan bala sııaqtymyn. Tepe-teńdikti saqtap turý men úshin qıyn. Óz denemdi ózime baǵyndyrýǵa tyrysyp jatyrmyn. Aıaǵymnan tik turý úshin qaı bulshyqetti qozǵasam, qulamaý úshin ne istesem degen oı ketpeıdi. Men osynyń barlyǵyn ıgerip ketetinime sene almaı turmyn. Men áli fınıshke jetpedim. Áli marafon júgirip kelemin», - dedi Ekaterına Parafıeva.
Eske sala keteıik, E. Parafıeva 16 maýsymda Almaty qalasyndaǵy ál-Farabı dańǵylynda bolǵan jol apatynan japa shekken bolatyn.
Honda CRV kóligin tizgindegen qyzdar ashyq lıýkke kirip ketip, kólik dóńgelegin jaryp alǵan. Sodan jol shetine toqtap, syrtqa shyǵyp, kólikterin qarap jatqan kezde ortańǵy jolaqta kele jatqan Toyota Camry mashınasyn avtobýs soqqan. Qatty soqqydan Toyota Camry aınalyp, artqy jaǵymen Honda CRV kóligin urǵan. Sonyń saldarynan qyzdar ortada qysylyp qalyp, bireýi eki aıaǵynan aıyryldy. Jarty jylǵa sozylǵan sot protsesinde avtobýs júrgizýshisi Dáýren Jańabaevtyń 2 jylǵa bas bostandyǵy shekteldi. Sonymen qatar, Jańabaev jábirlenýshige 2 mln teńge kóleminde moraldyq shyǵyn tóleýge mindetteldi.
Almatylyq kelinshek osydan 5 aı buryn Germanııanyń Mangeım qalasyna qonys aýdarǵan bolatyn.
Foto: www.facebook.com/ekaterina.parafiyeva
