Jol apatynan ata-anasy qaza bolǵan túlekke oblys ákiminiń oqý granty beriletin boldy
QYZYLORDA. QazAqparat - Búgin Qyzylorda oblysynyń ákimi Qyrymbek Kósherbaev 7 mamyr kúni jol apatynan qaza bolǵan jandardyń týystaryn jáne japa shekkenderdi qabyldady, dep habarlady oblys ákimdiginiń baspasóz qyzmetinen.
Aıta keteıik, aǵymdaǵy jyldyń 7 mamyr kúni «Batys Eýropa - Batys Qytaı» avtodáliziniń Qyzylorda oblysy, Shıeli aýdany, Tartoǵaı eldi mekeni tusynda jol-kólik apaty bolyp, 11 adam qaza bolǵan edi.
Bıýdjetten tys kózderden qaıtys bolǵan 11 adamnyń otbasyna 1 mıllıon teńgeden, al jaraqat alǵandarǵa 500 myń teńgeden qarjylaı kómek berildi.
- Árıne, qaıǵynyń ornyn toltyrý múmkin emes. Biraq qoldan kelgen kómekti jasaımyz. Sizder de túsinistikpen qarap, sabyrly bolyńyzdar. Mundaı jaǵdaı qaıtalanbas úshin abaı bolaıyq, - dedi oblys ákimi Q.Kósherbaev.
Jıynǵa qatysqan Qyzylorda oblystyq ishki ister departamenti bastyǵynyń tergeý jónindegi orynbasary Nurlan Anarbaev jol-kólik oqıǵasyna baılanysty qylmystyq is qozǵalyp, barlyq is boıynsha birneshe saraptamalar taǵaıyndalǵandyǵyn aıtty. Osy saraptama nátıjesi ádil, obektıvti júretinin jetkizdi. Al oblystyq densaýlyq saqtaý basqarma basshysynyń mindetin atqarýshy Sáken Serǵazıev aýrýhanada em alyp jatqan naýqastardyń jaǵdaıy birqalypty ekenin aıtyp, olarǵa qajetti medıtsınalyq kómek ýaqytyly kórsetilip jatqanyn baıandady.
Aımaq basshysy japa shekkenderdiń otbasyna qarjylaı kómekten bólek, qajetti áleýmettik qoldaý kórsetiletinin aıtty. Máselen, ata-anasynan aıyrylǵan mektep bitirýshi túlekke oblys ákiminiń oqý granty beriletin boldy.
