Jol apatyna ushyraǵan baıanaýyldyq oqýshylar shahmattan oblys chempıondary atandy
ASTANA. QazAqparat - Osydan birneshe kún buryn jol apatyna ushyraǵan Baıanaýyl aýdanynyń oqýshylary shahmattan oblystyq týrnırde top jardy, dep habarlaıdy pavlodarnews.kz.
Pavlodar oblysynyń bilim berý basqarmasy atap ótkendeı, baıanaýyldyqtar osymen 12-shi márte chempıon ataǵyn alyp otyr. - Úsh kúnge sozylǵan dodada aýdandar arasynda Baıanaýyl aýdanynyń oqýshylary alǵa shyqty. Ekinshi oryndy - Aqtoǵaı aýdanynyń, úshinshi oryndy Ertis aýdanynyń oqýshylary ıelendi. Qalalar arasynda Pavlodar qalasy kóshbasshy atansa, ekibastuzdyq oqýshylar ekinshi orynǵa laıyq dep tanyldy. Aqsýlyqtar úshinshi oryndy qanaǵat tutty. Jarysqa 70-ke tarta shahmatshy qatysty, - dedi bilim basqarmasynda.
Eske sala keter jaıt, «Astana-Pavlodar» tas jolynda Qalqaman aýylynyń mańynda jol apaty oryn alǵan bolatyn. 18 oqýshy otyrǵan mektep avtobýsyn Baıanaýyl aýdandyq ishki ister bóliminiń eki qyzmetkeri «Lada Granta» kóligimen ertip kele jatqan sátte kenetten qarsy jolaqqa júk kóligi shyǵyp ketip, oqys jaǵdaı oryn alǵan edi. Polıtseıler óz mashınalarymen kóldeneńdeı turyp, apattyń aldyn aldy. Qyzmetkerlerdiń biri Murat Nurseıitov aýyr jaraqattarmen aýrýhanaǵa túsken. Taǵy bir tártip saqshysy Baıanbek Júnisov aýrýhanaǵa jatýdan bas tartty. Oqýshylar zardap shekken joq.
