Jol apatyna túsken kisini qutqarý úshin kólikti kesýge týra keldi - SQO

PETROPAVL. QazAqparat – Soltústik Qazaqstan oblysynda avtomobıl jolynda eki kólik soqtyǵysyp, aýyr bas jaraqatyn alǵan júrgizýshini qutqarý úshin mashınany kesýge týra keldi, dep habarlaıdy QazAqparat tilshisi.

SQO tótenshe jaǵdaılar departamenti baspasóz qyzmetiniń málimetinshe, Petropavl-Mamlıýtka avtojolyndaǵy jol-kólik apaty týraly habar qutqarý qyzmetine 6 qarasha kúni saǵat 12.12 mınýt ketkende túsken. Departamenttiń jedel-qutqarý otrıady oqıǵa ornyna 20 mınýttyń ishinde jetip, birden iske kiristi.

Mamandardyń aıtýynsha, Audi men Toyota jeńil kólikteri soqtyǵysqan. Saldarynan Audi kóliginiń júrgizýshisi aýyr bas jaraqatyn alyp, aıaǵyn syndyrǵan. 1994 jyly týǵan er adam qatty zaqymdanǵan kólikten ózdiginen shyǵa almapty.

«Aýyr jaraqattanǵan er adamǵa zııan keltirmeý úshin operatsııany óte uqyppen júrgizýge týra keldi. Gıdravlıkalyq keskishpen kóliktiń artqy esigin jáne búıirindegi tireýishti kesip aldyq. Keıin gıdravlıkalyq domkratty qoldanyp, zardap shegýshiniń qysylyp qalǵan aıaǵyn bosattyq. Mashınadan abaılap shyǵaryp, bizdi kútip turǵan jedel járdem qyzmetkerlerine tabys ettik», - deıdi qutqarý bólimshesiniń bas qutqarýshysy Ádil Mustafın.

Aýyr jaraqat alǵan er adam medıtsınalyq mekemege jetkizildi.

«Jol-kólik oqıǵasynda bireýler tek bolmashy jaraqat alsa, endi biri sol jerde mert bolady. Zaqymdanǵan kólikte qystyrylyp qalǵandarǵa bizdiń kómegimiz qajet bolyp jatady. Qutqarý otrıadynyń tájirıbeli mamandary mundaıda zardap shegýshilerdi aman-esen alyp shyǵyp, tezirek dárigerlerdiń qolyna tapsyrady. Kólik júrgizýshilerine jolda abaı bolyńyzdar, jol qatelikti keshirmeıdi dep aıtqymyz keledi», - deıdi Ádil Mustafın.

Buǵan deıin«Chelıabi-Novosibir» avtojolynda bolǵan jol-kólik oqıǵasyna qatysta polıtseıler túsinik bergen edi.