Jol apatyna túsip, múmkindigi shektelgen túrkistandyq oqýshy ózine yńǵaıly aqyldy sómke jasap shyǵardy
Sómkeni ıesi pýltpen basqaryp jyljyta alady. Qısyq jol men shoqalaqtan da ońaı ótkizýge bolady. «Tórtkúl» jalpy orta mektebinde oqıtyn Aıtýar Sovetbek ózi oılap tapqan sómkeni sabaqqa ustap, kópti tańqaldyrdy. Oǵan bul oı muqtajdyqtan týǵan.
Aıtýar 1 jyl buryn jol apatyna túsip, kúrdeli ota jasalady. Dárigerler uzaq ýaqyt aýyr zat kóterýge tyıym salady, tipti kitap-dápter kóterýge de bolmaıtynyn aıtqan. Sabaqtan qalǵysy kelmegen ozat oqýshy tyǵyryqtan shyǵar jol izdep tapty.
«Úıde jatyp oqý qıyn, qataryńnan qalyp qoıǵandaı kúı keshesiń. Mektepke baraıyn desem densaýlyǵym jaramady, oqý-quralymdy tasıtyn bir adam kerek. Al úıdegilerdiń jumysy bar, únemi meniń qasymda júrmeıdi ǵoı. Sosyn kitaptarymdy tasý úshin pýltpen júretin sómkem bolsa dep oılap, ony aldymen qaǵaz, kartonnan jasap kórdim. Plastmassa jáshigin odan basqa birneshe materıaldy paıdalanyp, tıimdiligin tekserdim. Eń birinshi sómkem plastmassadan jasaldy, kitap-dápterlerimdi salyp mektepke deıin baramyn. Al satydan kóterýge synyptastarym kómektesedi», -deıdi Aıtýar.
Aıtýardyń bul ıdeıasyn anasy da qoldap, dızaınyna mán beredi. Uly oılap tapqan sómkeniń syrt pishinin jasaýǵa kómektesken. Qazir túrkistandyq oqýshy jyljymaly sómkeni odan ári damytý ústinde, satydan ózi shyǵatyn mehanızm jasap, ónimin satylymǵa da shyǵarý oıynda bar.
