Jol apatyn jıi jasaıdy: Almatyda kýrerlerdiń jáshikteri nómirlenetin boldy
ALMATY. QazAqparat - Almatyda kýrerlik jetkizý jáshikteri nómirlenetin boldy, dep habarlaıdy QazAqparat tilshisi.
Jetkizý qyzmetin kórsetetin kompanııalardyń basshylary mundaı sheshimge Almaty qalalyq Polıtsııa departamentinde ótken jumys kezdesýinde keldi.
«Ókinishke oraı, bizdiń tájirıbemizde kýrerlerdiń oqıǵa ornynan qashyp ketýine qatysty oqıǵalar kóp. Endi kýágerler jáshikte kórsetilgen nómirdi aıta alady – bul mańyzdy bastapqy derekter», – deıdi Almaty qalalyq Polıtsııa departamenti bastyǵynyń birinshi orynbasary Nurlan Almasbekov.
Polıtseıler qazirdiń ózinde keıbir kýrerlik kompanııalarmen memorandýmǵa qol qoıylǵanyn atap ótti.
«Sońǵy jyldary qalamyzdyń joldarynda mopedter, mototsıklder men skýterler kóptep paıda boldy, sondyqtan olardyń qatysýymen bolatyn jol-kólik oqıǵalarynyń kóbeıýi baıqalady. Jol-kólik apatynyń negizgi sebepteriniń biri – kólikti durys júrgizbeý, arnaıy qorǵanys quraldarynyń bolmaýy, kólik júrgizý qaýipsizdigi erejelerin saqtamaý. Kóliktiń bul túrin paıdalanatyn kýrerler kóbeıip ketti. Olar tabystaryn arttyrý maqsatynda jol qozǵalysy erejelerin óreskel buzýǵa jıi jol berip, kúndiz-túni qala joldarymen júredi», – dedi polıtsııa ókili.
