Jol apaty: Jedel járdem kóliginde bolǵan 2 jastaǵy balanyń jaǵdaıy turaqty
ALMATY. QazAqparat - Almatynyń dárigerleri jedel járdem kóligi apatynan zardap shekkenderdiń densaýlyǵy týraly aıtyp berdi, dep habarlaıdy QazAqparat.
«Keshe túnde 2/25 jedel járdem brıgadasy syrqat balany qaraýǵa attanǵan. 2 jastaǵy búldirshinge JRVJ dıagnozy qoıylǵan. Almaty qalalyq Juqpaly aýrýlar aýrýhanasyna jedeldetip jetkizý úshin qaıta shyqqan ýaqytta jol apaty bolady. Kólikte balanyń ata-anasy, sanıtar, feldsher, júrgizýshi bolǵan. Sonyń saldarynan feldsher jeńil jaralanǵan. Al, balany sol jerden 5/1 brıgadasy kelip juqpaly aýrýlar aýrýhanasyna alyp ketti», - dedi qalalyq Densaýlyq saqtaý basqarmasynyń baspasóz qyzmetindegiler.
Japa shekken dáriger №7 qalalyq aýrýhanada qaralyp, úıge emdelýge jiberildi.
Aıta ketý kerek, jol apaty túnde Bostandyq aýdanynda bolǵan edi.
«Sátpaev kóshesimen shyǵysqa baǵyt alǵan jedel járem kóligi Áýezov kóshesinde qyzyl baǵdarshamǵa ótken. Osy kezde Áýezov kóshesimen ońtústikten kele jatqan jeńil kólik jedel járdem qyzmetiniń kóligin soǵyp ketedi. Onyń saldarynan jedel járdem kóligi aýdarylyp qaldy», - dedi S.Ázirbek.
