Jol apaty saldarynan eki aıaǵynan aırylǵan kelinshek esin jıdy
ALMATY. QazAqparat - Jol apaty saldarynan eki aıaǵynan aırylǵan kelinshek esin jıdy. Qaryndasynyń jaǵdaıy týraly QazAqparat tilshisine aǵasy Evgenıı Parafıev aıtyp berdi.
«Ekaterına esin jıdy. Onyń jaǵdaıy jaqsaryp keledi. Eger bári jaqsy bolsa, ony erteń jansaqtaý bóliminen shyǵarýy múmkin. Oǵan aıaǵyńnan aıryldyń dep aıtpadyq. Biraq ol bárin bilip tur», - dedi E.Parafıev.
Onyń aıtýynsha, keı alaıaqtar kıvı-ámııandaǵy qarjyny qoldy etýge tyrysqan.
«Maǵan habarlasyp, pın-kodty suraǵandar boldy. Biraq aıtpadym. Aqshany alyp, anamyzdyń shotyna saldyq. Barlyǵy 7 mln shamasynda qarjy jınaldy. Bul qarjy qaryndasymnyń ońaltý em-sharasyna baǵyttalady», - dedi E.Parafıev.
Aıta ketý kerek, jol apaty Ál-Farabı dańǵylynda bolǵan. Honda CRV tizgindegen qyzdar ashyq lıýkke kirip ketip, kólik dóńgelegin jaryp alǵan. Sodan jol shetine toqtap, syrtqa shyǵyp kólikterin qarap jatqan kezde ortańǵy jolaqta kele jatqan Toyota Camry kóligin avtobýs soqqan. Soqqydan Toyota Camry kóliginiń artqy bóligi ushyp kelip Honda CRV kóligin soǵady. Saldarynan qyzdar ortada qysylyp qalǵan. Qalalyq ІІD baspasóz qyzmeti habarlaǵandaı, atalǵan derek QR QK 345-babynyń 2-bólimi boıynsha sotqa deıingi tergeý isi tizilimine tirkeldi.
Qalalyq Densaýlyq saqtaý basqarmasy habarlaǵandaı, patsıentterdiń biriniń aıaǵyndaǵy jaryqshaqty synyǵyna baılanysty tilersekten joǵary kesip tastaý uıǵaryldy .
Ekinshi qyz №7 qalalyq aýrýhanananyń nevrologııa bólimine jatqyzyldy .
