Jol apattarynyń 94,4 paıyzyn júrgizýshiler jasaıdy
ORAL. QazAqparat - Batys Qazaqstan oblysynda bıylǵy toǵyz aıda 337 jol-kólik oqıǵasy tirkelip, saldarynan 74 adam qaza tapty, taǵy 385-i túrli jaraqattar aldy.
BQO ishki ister departamentinen túsken málimetke qaraǵanda, sonyń 318-i nemese 94,4 paıyzy júrgizýshilerdiń kinásinen bolǵan. Mundaǵy basty sebepter joldyń qarama-qarsy betine shyǵyp ketý (11,3 paıyz), jyldamdyqty shekten tys arttyrý (34,7 paıyz) jáne qozǵalys kezinde araqashyqtyqty saqtamaý (5,6 paıyz) bolyp otyr. Jyl basynan beri 67525 jol erejesin buzýshylyq anyqtalsa, sonyń 1440-y - kólikti mas kúıinde aıdaý, 7603-i - jyldamdyqty shekten tys arttyrý, 518-i - qarsy betke shyǵyp ketý.
Óńirde jol-kólik oqıǵalary jıi oryn alatyn aýmaqtyń biri - Oral-Atyraý tas joly. Munda toǵyz aıda 27 jol apaty tirkelgen.
Jalpy, 2012 jyly 499 jol-kólik oqıǵasy bolyp, odan 95 adam kóz jumyp, 612-si jaraqat alsa, bul kórsetkishter 2013 jyly - sáıkesinshe 547, 100 jáne 689, 2014 jyly - 404, 84, 573, 2015 jyly 503, 99 jáne 642 bolǵan. ıAǵnı tórt jyl men bıylǵy toǵyz aıdy qosqanda, jol apatynan qaıtqandar sany 452-ge jetip otyr.
Eske sala keteıik, oblysta 7 jáne 8 qazan kúnderi qos birdeı jol apaty bolyp, sonyń saldarynan eki adam qaza tapty. Munyń ekeýinde de júrgizýshiler kólikke ıe bola almaı, qarsy betke shyǵyp ketip, basqa avtokóliktermen soqtyǵysqan.
