Jol apatynyń kýágeri ne isteýi kerek
ASTANA. KAZINFORM — Jol-kólik oqıǵasy kezinde alǵashqy mınýttar zardap shekken adamnyń ómirin saqtap qalýda sheshýshi ról atqarýy múmkin. QR Densaýlyq saqtaý mınıstrligi jol apatynyń kýágerlerine tótenshe jaǵdaı kezinde durys áreket etý boıynsha keńes berdi.
Mınıstrlik eń aldymen oqıǵa ornyndaǵy qaýipsizdikti qamtamasyz etý qajettigin eskertedi. Kýáger apattyq shamdardy qosyp, ózi men basqa adamdarǵa qosymsha qaýip tónbeýin qadaǵalaýy kerek.
Jedel járdemdi qalaı shaqyrý kerek
Jol-kólik oqıǵasy bolǵan jaǵdaıda 103 nemese 112 nómirine qońyraý shalyp, oqıǵanyń naqty ornyn jáne zardap shekkenderdiń sanyn habarlaý qajet.
Zardap shekken adamnyń jaǵdaıyn tekserińiz
Eger adam es-tússiz bolsa, onyń tynys alýyn tekserý kerek. Zardap shekken adam qalypty dem almaı jatsa, júrek-ókpe reanımatsııasyn bastaý qajet.
JÓR kezinde keýde qýysyna 30 ret basyp, keıin 2 ret dem berý usynylady. Bul áreketti medıtsınalyq kómek kelgenshe jalǵastyrý kerek.
Qatty qan ketse ne isteý kerek
Qan qatty ketken jaǵdaıda jaraqattanǵan jerdi taza matamen nemese dákemen basyp, jedel járdem kelgenge deıin qysymdy ustap turý qajet.
Zardap shekken adamdy sebepsiz qozǵaltpańyz
Mınıstrlik jol-kólik oqıǵasynan keıin zardap shekken adamdy qajet bolmasa ornynan qozǵaýǵa bolmaıtynyn eskertedi. Sebebi apat kezinde omyrtqa jaraqaty bolýy múmkin.
Osyǵan deıin eGov-ta adam aýrýhanaǵa túsken jaǵdaıda jaqyndaryna habarlaıtyn servıs iske qosylǵanyn jazǵanbyz.
