Jol apatynyń hattamalary nege kóbine orys tilinde toltyrylady – sýdıa pikiri

ASTANA. KAZINFORM – Elordada ákimshilik quqyqbuzýshylyq isterdiń qazaq tilinde qaralýy den alýda. Tolyǵyraq Astana qalasynyń sottarynda memlekettik tildi qoldaný aıasyn keńeıtý jáne damytý jumystaryn úılestirý komıssııasynyń tóraǵasy, sýdıa Aısulý Slambekova aıtyp berdi.

«Ákimshilik quqyqbuzýshylyq ister boıynsha aryz sotqa memlekettik múddeli organdardan kelip túsedi. Basym kópshiligi – jol-kólik oqıǵasyna baılanysty, polıtseılerdiń hattamalary negizinde. Astanada bir jyl ishinde 853 (34%) ákimshilik istiń qaralýy qazaq tiline ózgertilgen, ıaǵnı is orys tilinde túsip, keıin qazaq tiline kóshken. Onyń sebebi jol polıtsııasy qyzmetkeri men quqyqbuzýshy ekeýi de qazaq bola tura, qazaqsha sóılese otyryp, hattamany orys tilinde toltyrady», - dedi sýdıa Aısulý Slambekova.

Onyń aıtýynsha, is sotqa túskende sýdıalar jappaı qazaq tiline kóship jatyr.

Aıta keteıik, búgin Astanada qalalyq sottyń uıymdastyrýymen «Sot tóreligin memlekettik tilde júzege asyrý máseleleri» atty dóńgelek ústel ótti. Sharaǵa sýdıalar, advokattar, Májilis depýtattary men til mamandary qatysty.