Jol apatynan zardap shekkenderge ótemaqy kólemi artýy múmkin

ASTANA. KAZINFORM — Elde jol apatynan zardap shekkenderge tólenetin ótemaqy eki esege ósýi múmkin, dep habarlaıdy Jibek Joly telearnasy.

Májiliste mindetti avtosaqtandyrý týraly zańǵa túzetý engizý máselesi qaralyp jatyr. Qazir saqtandyrý kompanııalary tóleıtin soma kóp jaǵdaıda em-dom men ońaltýǵa jumsalatyn shyǵyndy tolyq ótemeıdi. Sol sebepti depýtattar tólem kólemin arttyrýdy usynyp otyr.

— Jańa túzetý qabyldansa, jol apatynan qaza tapqan nemese aýyr jaraqat alǵan adamnyń otbasyna 4000 AEK, ıaǵnı shamamen 16 mıllıon teńge ótemaqy tólenedi. Al múgedek bolyp qalsa, 1-toptaǵylarǵa 12 mln, 2-topqa — 9 mln, 3-topqa — 4 mln teńge, al balalar zardap shekse, onyń otbasyna 8 mln teńgege jýyq ótemaqy beriledi. Jeńil jaraqat alǵandarǵa burynǵydaı shamamen 1 mıllıon teńge kóleminde tólem qarastyrylyp otyr, — delingen telearna taratqan habarlamada.

Sońǵy derekterge súıensek, bıyl elimizde 26 myńnan astam jol apaty tirkelip, 1300-den asa adam kóz jumǵan. Myńdaǵan adam jaraqat alyp, múgedek bolyp qalǵan.

Májilismen Nurlan Áýesbaev Eńbek jáne halyqty áleýmettik qorǵaý mınıstrine múgedekterdiń járdemaqysyn 85 myń teńgege deıin kóterý kerek dep saýal joldady. Onyń sózinshe, elimizde 725 myń múgedek adam bar. Biraq olardyń sany áldeqaıda kóp bolýy múmkin. Qazir úshinshi toptaǵy múgedektiń járdemaqysy — 55 474 teńge. Áýesbaev járdemaqyny kem degende eń tómengi jalaqy 85 000 teńgege deıin kóterýdi usyndy.

Sonymen qatar múgedektikti anyqtaý protsedýralaryn jeńildetýdi, áleýmettik kómekterdi esepteýdiń jańa ádisnamasyn ázirleýdi talap etip otyr. 

Budan buryn habarlanǵandaı, Májilis halyqty sýmen taralatyn aýrýlardan qorǵaıtyn halyqaralyq qujat ratıfıkatsııasyn qabyldady.