Jol apatynan qaza tapqan túrkistandyq donor 4 adamnyń ómirin uzartty
ASTANA. KAZINFORM – Demalys kúnderi Astanadaǵy «Barys Arena» sport kesheninde 4 naýqastyń ómirin uzartqan donor Maksım Voınıýshany eske alýǵa arnalǵan hokkeı matchy ótti.
Ótken jyly 15 shildede Maksım Voınıýsha aýyr apatqa ushyrap, Túrkistan oblystyq klınıkalyq aýrýhanasyna shuǵyl jetkizilgen. 18 jastaǵy jas jigit moped rýlinde bolǵan jáne kólikpen soqtyǵysqan. Birneshe kúnnen keıin, 23 shildede Maksımniń mıynyń qaıtymsyz ólimi rastaldy.
Mı ólimi týraly habardan keıin Maksımniń týystarymen áńgime ótkizilgen jáne olar marqumnyń aǵzalaryn donorlyqqa berýdi uıǵarǵan.
− Bul oqıǵa – Maksım men onyń otbasyna alǵys bildirý men moıyndaý ǵana emes, Qazaqstanda qaıtys bolǵannan keıingi aǵzalar donorlyǵyn nasıhattaýdaǵy mańyzdy qadam. Búginde donorlyq aǵzalardy transplanttaýdy kútý paraǵynda 4117 adam, onyń ishinde 96 bala tur, − dep jazdy QR Densaýlyq saqtaý mınıstrligi.
Sońǵy 5 jylda Qazaqstanda aǵzalardy transplantattaý boıynsha 1005 ota júrgizildi, onyń ishinde aǵzalardyń 92,1%-y týystyq donorlardan, 7,9%-y – qaıtys bolǵannan keıingi donorlardan alynǵan.
Qazaqstanda aǵzalardy transplanttaý boıynsha joǵary tehnologııalyq ota jasaýǵa qajetti barlyq zamanaýı ınfraqurylym bar. Qazirgi ýaqytta elimizde 7 transplanttaý ortalyǵy jumys isteıdi, 40 donorlyq statsıonar, 4 ımmýnologııalyq tıpteý zerthanasy uıymdastyrylǵan. Donorlyq protsesti úılestirýdi, anyqtaýdy jáne uıymdastyrýdy qamtamasyz etetin respýblıkalyq, óńirlik jáne statsıonarlyq úılestirýshiler jelisi qurylǵan.
Almaty oblysynda alǵashqy donorlyq operatsııa jasalǵanyn jazǵan bolatynbyz.