Jol apatynan qaza tapqan balalar sany artyp barady – ІІM
10 aıda elimizde jol apatynan qaza tapqan balalardyń sany 14 paıyzǵa artty. Bul týraly Іshki ister mınıstrligi Ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova aıtty, dep habarlaıdy Kazinform.
«Ókinishke qaraı, halyqpen jyl saıynǵy aǵartý jumystaryn júrgizýge qaramastan balalardyń qaýipsizdigine qater tóndiretin bir problemaǵa – jol-kólik oqıǵalaryna tap bolamyz. Osy jyldyń 10 aıynda jol-kólik oqıǵasy kezinde qaza tapqan balalardyń sany 14, al zardap shekken balalardyń sany 3 paıyzǵa artyp otyr. Zardap shekken balalardyń jartysynan kóbi jolaýshylar, al qalǵany jaıaý júrginshiler. Kóp jaǵdaıda balalar eresekterdiń tasymaldaý erejelerin buzǵany úshin zardap shegedi. Sebebi olar avtooryndyqtar, býsterler jáne adapterler sııaqty balalardy ustaıtyn qurylǵylardy paıdalanbaıdy. Balalarǵa qaýipsizdik deńgeıin baǵalaýdy úırenýge jáne qıyn jaǵdaılarda ózderin senimdi sezinýge kómektesýimiz kerek», - dedi Aqtoty Boranova mınıstrliktiń baspasóz qyzmeti alańynda ótken brıfıngte.
Onyń atap ótýinshe, balanyń joldaǵy minez-qulqy kóbinese ata-anasynyń minez-qulqyna baılanysty. Sondyqtan eger ata-analar jol qaýipsizdigi erejeleri týraly sóılesip qana qoımaı, olardy ózderi saqtasa, bul minez-qulyq bala úshin normaǵa aınalady.
«Jaıaý júrginshiler kináli bolatyn jol-kólik oqıǵalarynyń negizgi sebebi – belgilenbegen jerden joldy kesip ótýi, jaqyndap qalǵan kóliktiń aldynan júgirip ótý jáne baǵdarshamnyń tyıym salý sıgnalyna ótý», - dedi ol.
