Jol apatynan qaza tapqan azamattardyń týystaryn Mańǵystaý oblysyna jetkizý úshin bort jiberildi

AQTAÝ. KAZINFORM — ІІM Ulttyq ulan borty jol apatynan qaza tapqan azamattardyń týystaryn Mańǵystaý oblysyna jetkizý úshin jiberildi. 

Bortta denelerin sáıkestendirý jáne basqa qajetti rásimderdi ótkizý úshin jol-kólik oqıǵasynda qaza tapqandardyń týystary ushyp barady. 

Bort qaza tapqandardyń denelerin óz aımaqtaryna jetkizý úshin de paıdalanylady. Qaza tapqandardyń ishinde  bes áıel Qaraǵandy oblysynan, bireýi Astana qalasynyń turǵyny.

— Bul shara qaza tapqandardyń otbasylaryna jedel kómek kórsetý, denelerdi sáıkestendirý rásimderine qatysý, olardy tasymaldaý jáne keıingi jerleý uıymdastyrý jumystaryn operatıvti sheshý maqsatynda uıymdastyryldy, — dedi ІІM resmı ókili - departament bastyǵy Shyńǵys Alekeshev. 

Aıta keteıik, 11 qyrkúıek kúni Mańǵystaý oblysy Qaraqııa aýdany Senek eldi mekeninen 90 shaqyrym jerdegi avtojolda jol apaty bolyp, 10 adam qaza tapty.

Sonymen qatar jol apatynan aman qalǵan úsh adamnyń jaǵdaıy týraly jazǵan edik. Sondaı-aq 10 adamnyń ómirin qıǵan apattan keıin jedel shtab qurylǵan edi.