Jol apatyna kináli adam oqıǵa ornynan qashyp ketse ne isteý kerek
ÓSKEMEN. KAZINFORM — Keı jaǵdaıda jol apatyna kináli adam oqıǵa ornynan iz sýytyp ketedi. Osyndaı jaǵdaıda ne isteý kerektigin jáne qashyp ketken adamnyń qandaı jazaǵa tartylatynyn anyqtap kórdik.
Zań boıynsha jol apatyna túsken adamnyń ne isteý kerektigin bilý úshin ShQO polıtsııa departamentine resmı saýalhat joldadyq
— Eń aldymen júrgizýshi kóligin dereý toqtatyp, ony ornynan qozǵamaýy qajet. Apattyq jaryq sıgnalyn qosyp, apatty toqtaý belgisin jol qozǵalysy erejeleriniń talaptaryna sáıkes qoıýy kerek. Sondaı-aq oqıǵaǵa qatysty zattar bolsa ony da ornynan qozǵamaýy tıis. Jaraqat alǵandar bolsa dáriger kelip jetkenge deıingi alǵashqy medıtsınalyq kómek kórsetip, jedel járdem shaqyrýy qajet. Eger jaǵdaı shuǵyl bolyp, jedel járdemdi kútý múmkin bolmasa, zardap shekkenderdi ótip bara jatqan kólikpen nemese óz kóligimen jaqyn mańdaǵy medıtsınalyq mekemege jetkizýi kerek. Bul kezde júrgizýshi óziniń aty-jónin, kóliktiń memlekettik tirkeý nómirin aıtyp, jeke basyn kýálandyratyn qujatty nemese júrgizýshi kýáligin jáne kóliktiń tirkeý qujatyn kórsetýge mindetti. Medıtsınalyq mekemege jetkizgennen keıin júrgizýshi oqıǵa ornyna qaıta oralýy tıis, — dep jaýap berdi departamenttiń baspasóz qyzmetinen.
Jol apaty týraly polıtsııaǵa dereý habarlap, oqıǵanyń kýágerleri bolsa, olardyń aty-jóni men mekenjaıyn jazyp alýy kerek.
Sodan keıin jol saqshylary kelgenshe apat ornynda kútýge mindetti (eger bul jaǵdaı jol qozǵalysy erejeleriniń 1-bólimindegi 8-tarmaqta kórsetilgen erekshelikterge jatpasa).
— Al eger jol-kólik oqıǵasy saldarynan basqa kólikterdiń qozǵalysy múmkin bolmasa, júrgizýshi joldy ashýy tıis. Joldy ashar aldynda kólik pen apatqa qatysty izder men zattardyń ornalasýyn kýálardyń qatysýymen tirkep, olardy múmkindiginshe sol qalpynda saqtaý qajet. Sonymen qatar apat ornyn aınalyp ótý úshin qaýipsiz jaǵdaı jasaýǵa mindetti, — delingen aqparatta.
Jol apatyna kináli adam oqıǵa ornynan qashyp ketse onda onyń kóligin, memlekettik tirkeý nómirin jattap alyp, polıtsııaǵa habarlaý qajet.
Eger júrgizýshi jol-kólik oqıǵasyna baılanysty zańmen bekitilgen mindetterdi oryndamasa, ol Ákimshilik quqyq buzý kodeksiniń 611-baby boıynsha jaýapkershilikke tartylady.
Naqty aıtqanda:
- Jol-kólik oqıǵasyna qatysqan júrgizýshiniń zańda kózdelgen mindetterin oryndamaýy — 5 AEK (19 660 teńge) mólsherinde aıyppul salýǵa ákeledi.
- Jol apaty bolǵan jerden ketip qalý — 50 (196 600 teńge) AEK kóleminde aıyppul nemese bir jylǵa kólik quralyn basqarý quqyǵynan aıyrý jazasyna ákelip soǵady.
- Júrgizýshi kýáligi joq nemese kólik aıdaý quqyǵynan aıyrylǵan adam bolsa — 100 AEK (393 200 teńge) mólsherinde aıyppul tóleýge mindetteledi nemese 30 táýlikke ákimshilik qamaýǵa alynady.
Jol-kólik oqıǵasy — tek sátsizdik emes, úlken jaýapkershilik. Zań talaptaryn oryndaý — ózińizdiń ǵana emes, ózgelerdiń de ómiri men qaýipsizdigin qorǵaý ekenin qaperde ustańyz!
Eske salsaq, osyǵan deıin Shymkentte júrgizýshi kýáligin zańsyz berýmen aınalysqan top ustalǵany habarlanǵan.