Jol apatyn jasap, kisi ólimine sebepker bolǵan ІІM kúzet basqarmasynyń burynǵy bastyǵy sottaldy

PAVLODAR. KAZINFORM -Pavlodarda Іshki ister mınıstrligi mamandandyrylǵan kúzet basqarmasynyń burynǵy bastyǵy Aıdar Nurmuhambetovke qatysty sot úkimi shyqty.

Ol byltyr jazda avtojolda jol apatyn týdyryp, saldarynan bir adam kóz jumǵan edi.

Qaıǵyly oqıǵa 2024 jyldyń shilde aıynda túnde bolǵan. A.Nurmuhambetov masań kúıde «Lexus LX 570» markaly avtokóligin basqaryp kele jatyp «Pavlodar-Semeı» tas jolynda «Volga» avtokóligimen soqtyǵysqan. Saldarynan «Volga» jol shetine aýdarylyp, júrgizýshisi sol jerde qaıtys boldy.

- Sot Aıdar Nurmuhambetovty Qylmystyq kodekstiń 345-1-baby 3-bóligimen qylmystyq quqyq buzýshylyq jasaǵany úshin kináli dep tanyp, oǵan 3 jyl 6 aıǵa bas bostandyǵynan aıyrý jazasyn jáne kólik quraldaryn basqarý qyzmetimen aınalysýǵa 10 jylǵa deıin tyıym salý jazasyn taǵaıyndady, - dep málimdedi Pavlodar qalasynyń №2 sotynyń sýdıasy Bıbigúl Sabıtdenova.

Sottalýshy azamat jazasyn qaýipsizdigi tómen qylmystyq-atqarý mekemesinde óteıtin bolady. Buǵan qosa ol marqumnyń týystaryna 10 mıllıon teńgeden astam jáne «Volga» kóliginiń jolaýshysyna 7 mıllıon teńgeden astam materıaldyq jáne moraldyq shyǵyndardy tóleýge mindettendi.

Eske sala keteıik, Jetisýda jol apatynan 4 adam qaıtys boldy.