Jol apaty: Shavkat Rahmonovtyń burynǵy áıeline qatysty sot úkimi shyqty

ASTANA. KAZINFORM — Sot G.Rahmonovaǵa qatysty adam ólimine ákep soqqan jol-kólik oqıǵasy týraly isti qarady, dep habarlaıdy Jambyl oblysynyń QІjMAS baspasóz qyzmeti.

Jambyl oblysynyń qylmystyq ister jónindegi mamandandyrylǵan aýdanaralyq soty azamatsha R.-ǵa qatysty abaısyzda 2 adamnyń ólimine ákep soqqan jol júrisi qaǵıdalaryn buzý faktisi boıynsha qylmystyq isti qarady (QK 345-babynyń 4-bóligi).

Sottalýshynyń kinási taraptardyń aıǵaqtarymen, sarapshylardyń qorytyndylarymen jáne istiń basqa materıaldarymen dáleldendi.

Prokýror 7 jylǵa deıin avtokólik quraldaryn basqarý quqyǵynan aıyra otyryp, 5 jylǵa bas bostandyǵynan aıyrýdy, jazany oryndaýdy 5 jylǵa keıinge qaldyrýdy surady.

Al jábirlenýshi taraptar (sottalýshynyń qaıtys bolǵan dosynyń ákesi jáne ápkesiniń jubaıy) sottalýshyny keshirdi, talap qoıý aryz bermedi, sottan bas bostandyǵynan aıyrýǵa baılanysty emes jaza taǵaıyndaýdy surady.

Sondaı-aq, sottalýshy óz kinásin moıyndamady.

Sot áıeldiń 2 jastan 9 jasqa deıingi 4 balasy bar ekenin eskerdi, onyń jazasyn aýyrlatatyn basqa mán-jaılar anyqtalmady.

— Sot úkimimen R. QK 345-babynyń 4-bóligi boıynsha kináli dep tanyldy jáne oǵan 7 jyl merzimge avtokólik quraldaryn basqarý quqyǵynan aıyra otyryp, 5 jyl merzimge bas bostandyǵynan aıyrý jazasy taǵaıyndaldy. QK 74-babynyń 1-bóliginiń negizinde jazany oryndaý 5 jylǵa keıinge qaldyryldy. Úkim zańdy kúshine engen joq, — delingen habarlamada.

Eske salsaq, 2025 jylǵy 27 shildede saǵat 8:30 shamasynda Jambyl oblysy Moıynqum aýdanyndaǵy «Almaty-Ekaterınbýrg» tasjolynda «Toyota Land Cruiser» markaly avtokólik apatqa ushyrady. Róldi tizgindeı almaǵan Shavkat Rahmonovtyń eks-zaıyby joldyń qarsy betine shyǵyp, aýdarylyp qalady. Saldarynan 2 jolaýshy (sottalýshynyń dosy men ápkesi) aýyr dene jaraqattarynan kóz jumdy, sottalýshynyń ózi aýrýhanaǵa jatqyzyldy.