Jol apaty saldarynan bolatyn ólim kórsetkishi azaıdy - DSM
ASTANA. KAZINFORM - 2025 jyly jol-kólik oqıǵalary saldarynan 51 myńnan astam qazaqstandyq zardap shekti. Soǵan qaramastan, der kezinde kórsetilgen bilikti medıtsınalyq kómektiń arqasynda ólim kórsetkishin 9,7%-ǵa tómendetýge qol jetkizildi.
Bul týraly QR Densaýlyq saqtaý mınıstrliginiń bas shtattan tys travmatology, akademık N.J. Batpenov atyndaǵy Ulttyq ǵylymı travmatologııa jáne ortopedııa ortalyǵynyń dırektory Oljas Bekarısov málimdedi.
2025 jyldyń qorytyndysy boıynsha Qazaqstanda 36 myńnan astam jol-kólik oqıǵasy tirkeldi, bul ótken jylmen salystyrǵanda 14,4%-ǵa kóp. Jol apattarynyń saldarynan 51 myńnan astam adam jaraqat alyp, 2 330 adam qaza tapty.
Jol apattary men zardap shekkender sanynyń ósýine qaramastan, ólim deńgeıiniń tómendeýi baıqalady – ólim kórsetkishi 2024 jylmen salystyrǵanda 9,7%-ǵa qysqardy.
Barlyq jol-kólik oqıǵalarynyń úshten biri Almaty qalasy men Almaty oblysynda tirkelgen.
Óńirler boıynsha statıstıka kelesideı: Almaty qalasy (8954), Almaty oblysy (5987), Jambyl oblysy (3276), Aqtóbe oblysy (3053) jáne Atyraý oblysy (2785).
Jedel medıtsınalyq járdem qyzmetiniń derekteri boıynsha jaraqattar boıynsha túsken shamamen 796 myń shaqyrtýdyń 44 myńy (5,6%) jol-kólik oqıǵalarymen baılanysty. Jedel járdem brıgadalarynyń kelýiniń ortasha ýaqyty halyqaralyq usynymdarǵa sáıkes keledi jáne qalada shamamen 8 mınýtty, aýyldyq jerlerde 9 mınýtty quraıdy.
«Altyn saǵat» qaǵıdaty sheńberinde zardap shekkender 34 mınýttyń ishinde medıtsınalyq uıymdarǵa jetkiziledi, bul ólim deńgeıin tómendetýde jáne jaraqat saldarynyń aýyrlyǵyn azaıtýda sheshýshi ról atqarady.
Mamandardyń aıtýynsha, ólim kórsetkishteriniń belgili bir jaqsarýy baıqalǵanymen, jol apattarynan jaraqattaný kórsetkishin azaıtý úshin keshendi vedomstvoaralyq tásil qajet. Bul aldyn alý sharalaryn kúsheıtýdi, jol qozǵalysyna qatysýshylardyń mádenıetin arttyrýdy jáne shuǵyl medıtsınalyq kómek kórsetý júıesin jetildirýdi qamtıdy.
-Osy baǵytta Densaýlyq saqtaý mınıstrligi 2026–2030 jyldarǵa arnalǵan joldardaǵy ólim men jaraqattaný jaǵdaılaryn tómendetýge baǵyttalǵan vedomstvoaralyq is-sharalar josparyn ázirledi. Qujat densaýlyq saqtaý ınfraqurylymyn damytý men kadr daıarlaýdan bastap, vedomstvoaralyq ózara is-qımyldy kúsheıtýge jáne jol-kólik oqıǵalaryna den qoıý tıimdiligin arttyrýǵa deıingi júıeli sharalardy qamtıdy,-delingen habarlamada.
Osyǵan deıin Qazaqstanda densaýlyq saqtaýdy damytý tujyrymdamasy 2029 jylǵa deıin uzartylǵany týraly jazdyq.
