Jol apaty kezinde Eýrohattamany qalaı qoldanady

PETROPAVL. KAZINFORM – Soltústik Qazaqstan oblysynyń prokýrorlary jol-kólik oqıǵalary kezinde Eýrohattamany qoldaný tártibin túsindirdi. 

Vedomstvonyń málimetinshe, 2024 jylǵy 1 qańtardan bastap Qazaqstanda polıtsııa qyzmetkerlerin shaqyrmaı jáne sot organdaryna júginbeı, jol-kólik oqıǵalarynyń jeńil túrleri boıynsha saqtandyrý jaǵdaılaryn resimdeýdiń jeńildetilgen tártibi engizilgen.

Osy maqsatta jol-kólik oqıǵasyna qatysýshylarǵa apattyń mán-jaılaryn óz betinshe tirkeýge jáne saqtandyrý jaǵdaıyn elektrondyq formatta rásimdeýge múmkindik beretin «Eýrohattama» arnaıy mobıldi qosymshasy ázirlendi.

Eýrohattamany qoldaný mynadaı sharttar saqtalǵan jaǵdaıda múmkin:

• jol-kólik oqıǵasyna tek eki kólik quraly qatysýy;
• eki júrgizýshiniń de mindetti saqtandyrý polısiniń qoldanysta bolýy;
• zalaldyń tek kólik quraldaryna ǵana keltirilýi;
• qatysýshylar arasynda kelispeýshiliktiń bolmaýy;
• shyǵyn mólsheriniń 100 aılyq eseptik kórsetkishten aspaýy.

Qazirgi tańda 1 AEK – 4 325 teńge.

Prokýratýranyń atap ótýinshe, Eýrohattamany paıdalaný júrgizýshilerge ákimshilik jaýaptylyqtan jaltarýǵa, sondaı-aq ákimshilik jáne sot rásimderinsiz saqtandyrý tólemderin alý merzimin edáýir qysqartýǵa múmkindik beredi.

Tetikti keńinen qoldaný maqsatynda prokýratýra organdary jol qozǵalysyna qatysýshylarmen jáne saqtandyrý uıymdarynyń ókilderimen júıeli túsindirý jumystaryn júrgizip jatyr.

Qadaǵalaý organy mobıldi qosymshany paıdalaný boıynsha suraqtar týyndaǵan jaǵdaıda 2-57-0 qysqa nómiri arqyly Call-ortalyqqa júginýge bolatynyn eske saldy.