Jol apaty: Aqtóbede aman qalǵan 4 adam aýrýhanaǵa jetkizildi

AQTÓBE. KAZINFORM - Aqtóbede jol-kólik apaty kezinde aman qalǵan tórt adam aýrýhanaǵa jetkizildi. Onyń bireýi – 12 jastaǵy qyz.

Samara-Shymkent tasjolynyń Aqtóbe qalasy aýmaǵynda jeńil jáne júk kóligi soqtyǵysyp, 4 adam aýrýhanaǵa jetkizildi. Oqıǵa ornyna jedel járdemniń jáne apatty medıtsınanyń 4 brıgadasy bardy.

«Tórt adamǵa kómek kórsetildi. 2012 jyly týǵan qyz túrli dene jaraqatyn alǵan. Jaǵdaıy asa aýyr. Sol qyzdyń 18 jastaǵy aǵasy da kópsalaly balalar aýrýhanasyna jetkizildi. Esin bilgenimen, jaǵdaıy turaqty aýyr. Al 1981 jylǵy áıel jabyq bas-mı jaraqatyn alǵan. Esin biledi, jaraqaty kóp», - dep habarlady oblystyq Densaýlyq saqtaý basqarmasynyń baspasóz qyzmeti.

Júk kóliginiń júrgizýshisi de jaralanǵan. Ol oblystyq kópsalaly aýrýhanaǵa jetkizildi.

«Jol-kólik oqıǵasy bolǵan jerde bir brıgada bar. Kólik ishinde qysylyp qalǵan eki adamdy alyp shyqsa, qaraıdy. Al aýrýhanaǵa jetkizilgen adamdar tekserilip jatyr», - dedi oblystyq Densaýlyq saqtaý basqarmasynyń baspasóz qyzmeti.

Eske salsaq, Aqtóbe qalasy aýmaǵynda jeńil jáne júk kóligi soqtyǵysty. Saldarynan jeńil kóliktiń aldyńǵy bóligi japyrylyp qaldy.