«Jol aktıvteri sapasynyń ulttyq ortalyǵy» BQO fılıalynyń eks-basshysy 10 jylǵa sottaldy
BQO qylmystyq ister jónindegi mamandandyrylǵan aýdanaralyq sotynyń sýdıasy Aslanbek Dúısenǵalıev málim etkenindeı, Z.Qypshaqbaev QR Qylmystyq kodeksiniń 366-baby 4-bóligine sáıkes aıypty dep tanylyp, 10 jylǵa bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteıtin bolady. Ol sondaı-aq memlekettik qyzmette jáne basqa uıymdarda laýazymdy qyzmet atqarý quqyǵynan ómir boıyna aıyryldy. Sonymen qatar sottalýshydan onyń alǵan 30 mln teńge parasy memleket paıdasyna óndirildi.
Sotta anyqtalǵanyndaı, memlekettik qyzmetti oryndaýǵa teńestirilgen adam bola tura, Z.Qypshaqbaev «DSK Prıorıtet» JShS dırektory Janna Kenjınadan asa iri kólemde para alýdy josparlaǵan. Osy maqsatta arnaıy jospar-keste ázirlemeı jáne ony tapsyrys berýshimen bekitpeı, 2022 jylǵy 12-17 mamyr aralyǵynda óz qalaýymen fılıal qyzmetkerlerin «DSK Prıorıtet» JShS-nyń Aqsaı-Shyńǵyrlaý jol qurylysy nysanyn tekserýge jibergen. Sodan keıin alynǵan synamalardyń talapqa saı kelmeıtini týraly synaq hattamalaryn atalǵan seriktestikke joldaǵan.
Sosyn Z.Qypshaqbaev J.Kenjınaǵa kelip, jol nysandary boıynsha oń zerthanalyq qorytyndy shyǵarý úshin jáne materıaldardyń sapasyna tıisti zertteý boıynsha sharalar qabyldamaımyn, jalpy qamqorlyq kórsetemin dep ár aı saıyn 5 mln teńge berýin talap etken. J.Kenjına bul zańsyz talaptarmen kelisken.
Sol kúni Z.Qypshaqbaev onyń qylmystyq pıǵylynan beıhabar bolǵan óziniń dosy Ihsanovty «DSK Prıorıtet» JShS keńsesine jumsap, J.Kenjınadan sáýir-mamyr aılary úshin 10 mln teńgeni alǵan. Oǵan qosa maýsym, shilde jáne tamyz aılarynda osyndaı jolmen 15 mln teńgege qol jetkizgen. Munymen toqtamaı, qyrkúıekte ózi baryp, 5 mln teńgeni alyp ketken.
Qazan aıy úshin parasyn almaǵandyqtan, Z.Qypshaqbaev iriktelgen synamalardyń talaptarǵa saı kelmeıtini jónindegi synaq hattamalaryn taǵy joldaǵan. Aqyry 28 qarasha kúni J.Kenjınanyń jumys ornyna kelgen. Ony 2 mln teńge para alyp jatqan jerinen QR Ulttyq qaýipsizdik komıteti BQO boıynsha departamentiniń qyzmetkeri ustady.
Osylaısha, Z.Qypshaqbaev «DSK Prıorıtet» JShS dırektory J.Kenjınadan 2022 jylǵy mamyr-qarasha aralyǵynda barlyǵy 32 mln teńge para alǵan.
Sot úkimi zańdy kúshine engen joq.
