Joqtan bar jasap otyrǵan kitaphanashylarǵa ádistemelik qoldaý kerek - mınıstr
Mınıstrliktiń apparat májilisinde «Oqýǵa qushtar mektep» jobasynyń iske asý barysy talqylandy. Baıandama jasaǵan Respýblıkalyq ǵylymı-praktıkalyq bilim mazmunyn saraptaý ortalyǵynyń dırektory Eldos Nurlanov balalar ádebıetiniń ishinde ǵylymı fantastıkany damytýdyń mańyzyna toqtalyp, Qytaıdyń tájirıbesin mysalǵa keltirdi.
Aıtýynsha, bul elde ǵylymı fantastıkany damytýǵa baǵyttalǵan arnaıy zań qabyldanyp, Jazýshylar qaýymdastyǵy janynan Ǵylymı fantastıka komıteti qurylǵan.
Mınıstr Ashat Aımaǵambetov áýeli mektep kitaphanalarynyń qoryn ulttyq qundylyqtarmen baıytý mańyzdy ekenin atady.
«Jalpy óńirlerde «Oqýǵa qushtar mektep» jobasy qalaı iske asyp jatqany týraly tolyqqandy aqparat bolǵany abzal. Kerek bolsa, ár mektepti taldaý kerek. Onyń kitap qory qandaı, soǵan mán berilýi shart. Men mektepterdi aralaǵanda birinshi kezekte kitaphanalaryna baramyn, kitaphanashylarymen áńgimelesemin. Biraz áriptesterimiz bar, kitap dese, kózi janyp, kádimgideı joqtan bar jasap otyr. Al keı jerlerde kitaphanasy da bar, biraq jumysty uıymdastyrǵannyń ózinde balalarǵa qyzyqty emes, basqa ádebıetterdi birinshi orynǵa qoıyp qoıǵan. Balalar ózderi izdep tapsyn degen qatynas bul. Biraq bala kitaphanaǵa kirip kelgende «men mundamyn» dep turatyn bolýy kerek. Sondyqtan ádistemelik jaqtan da tıisti súıemeldeý jumysyn júrgizý kerek», - dedi vedomstvo basshysy.
Mınıstr mektepke kitap satyp alý kezinde ulttyq qundylyqtarǵa basymdyq berilý kerektigin eske saldy.
«Qajetti oqýlyqtardy, qajetti kórkem ádebıetti satyp alý jumysyn júrgizý qajet. Ásirese bizdiń ulttyq qundylyqtardy dáripteıtin, osy sheńberdegi týyndylar kóp bolýy kerek. Bizdiń ańyzdar, batyrlar jyry týraly týyndylardy mindetti tizbege qostyq. Mektep kitaphanalaryn qazaqtyń ár túrli ulttyq ertegilerimen, ańyzdarymen qamtamasyz etý máselesin bólek qarastyryńyzdar»,- dedi Ashat Aımaǵambetov.
