Joq páterge 10 mln teńge: Aqmola oblysynyń turǵyny alaıaqqa aldandy
AQMOLA OBLYSY. KAZINFORM – Aqmola oblysynyń turǵyny elordadan páter alyp beremin degen tanysyna senip, oǵan 10 mln teńgege jýyq aqsha bergen, dep habarlaıdy Kazinform tilshisi.
Aqmola oblysy Polıtsııa departamenti baspasóz qyzmetiniń málimetinshe, birneshe jyl buryn tanysy áıelge Astanada tyıym salynǵan páterdi satyp alýǵa kómektesetinin aıtqan. Onyń sózinshe, jyljymaıtyn múlikti rásimdeýge ýaqyt pen qosymsha shyǵyn qajet bolǵan.
– 2022 jyldan bastap jábirlenýshi tanysyna birneshe ret aqsha bergen. Kúdikti qarajattyń túrli jarnalardy tóleýge, qyzmet aqysyn óteýge jáne uıymdastyrý máselelerin sheshýge qajet ekenin túsindirgen. Birneshe jyl ishinde berilgen aqshanyń jalpy somasy shamamen 10 mln teńgege jetken. Alaıda ýáde etilgen páter satyp alynbaǵan, jábirlenýshi aqshasyn da qaıtara almaǵan, – dep habarlady vedomstvodan.
Máseleniń sheshilýin kútken áıel aqyry polıtsııaǵa júgingen. Alaıaqtyq faktisi boıynsha qylmystyq is qozǵaldy. Qazir qajetti tergeý amaldary júrgizilip, oqıǵanyń barlyq mán-jaıy anyqtalyp jatyr.
Eske salaıyq, buǵan deıin «SMS-blaster» arqyly 150 myń alaıaqtyq habarlama taratqan toptyń ustalǵanyn jazdyq.
