Joq adamdy jumysqa turǵyzǵan Velosport ortalyǵynyń basshysy ustaldy

ASTANA. QazAqparat - QR Mádenıet jáne sport mınıstrligine qarasty «Velosıped sportynan olımpıadalyq daıarlaý ortalyǵy» respýblıkalyq memlekettik qazynalyq kásiporny basshysynyń zańsyz áreketteri áshkerelendi. Bul týraly búgin Astanada ótken baspasóz máslıhatynda belgili boldy, dep habarlaıdy QazAqparat tilshisi.

«Sybaılas jemqorlyqqa qarsy is-qımyl ulttyq bıýrosy Mádenıet jáne sport mınıstrligi «Velosport boıynsha daıarlaý ortalyǵy» respýblıkalyq memlekettik kásipornynyń basshysyna qatysty qylmystyq isti tergeýde. Ol ortalyqta is júzinde jumys istemegen tulǵalarǵa eńbekaqyny esepteý, sondaı-aq zańsyz ústemeaqylardy tóleý arqyly aqsha jymqyrdy degen kúdikke ilindi», - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń qoǵammen baılanys jónindegi departamentiniń dırektory Arman Berdalın.

Onyń aıtýynsha, qazirgi ýaqytta atalmysh is boıynsha sotqa deıingi tergeý amaldary júrgizilip jatyr.

Eske sala ketsek, atalmysh baspasóz máslıhaty barysynda Arman Berdalın para aldy degen kúdikpen respýblıkanyń birqatar oblystarynda memlekettik organdardyń ókilderi ustalǵanyn habarlaǵan bolatyn.