Joǵary synypqa arnalǵan oqý materıaldarynyń mazmuny jańartylady - A.Sárinjipov
ASTANA. QazAqparat - Joǵary synypqa arnalǵan oqý materıaldarynyń mazmuny jańartylady. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Bilim jáne ǵylym mınıstri Aslan Sárinjipov aıtty.
«Syrtqy faktorlardy eskere otyryp, bizge 12 jyldyq bilim berýge kóshýdi kesheýildetýdi usynǵan edi. Degenmen, ózderińiz biletindeı, Úkimettiń keńeıtilgen otyrysynda Memleket basshysy naqty ári aıqyn mindet júktedi: syrtqy faktorlar áseri men bıýdjettiń ońtaılandyrylýyna qaramastan bilim berýdi jańǵyrtý baǵdarlamasyn jalǵastyrý qajet. Biz ózimizdiń orta bilim berý júıemizdiń álemdik standarttarǵa saı bolýyna umtylýymyz kerek»,- dedi mınıstr.
Onyń aıtýynsha, mınıstrlik daıyndyq synyptaryn eskere otyryp, 12 jyldyq bilim berý júıesin usynyp otyr. Óıtkeni, búgingi tańda 6 jasqa tolǵan balalardyń shamamen 95 paıyzy daıyndyq synyptaryna barýda. Sondyqtan da bilim berý baǵdarlamasynyń mazmuny atalǵan jaıtty eskere otyryp jańǵyrtylatyn bolady.
«Osylaısha biz qazirgi ýaqytta jańa standarttarmen, jańa oqý baǵdarlamalarymen jumys isteýdemiz. Jyl sońyna deıin ol jumystar jalǵasatyn bolady. Oqýshylarǵa qajetti daǵdyny biz bastaýysh jáne negizgi mektep aıasynda beretin bolamyz. Al eki joǵary synyp úshin oqý materıaldarynyń mazmuny jańartylady jáne akademııalyq daǵdy usyný arqyly beıindi oqytýǵa baǵyttalady»,- dedi ol.
