Joǵary suranysqa ıe 30-ǵa jýyq anyqtama joıylady

NUR-SULTAN. QazAqparat - 30-ǵa jýyq joǵary suranysqa ıe anyqtama joıylady. Bul týraly Úkimet otyrysynda QR Tsıfrlyq damý, ınnovatsııalar jáne aeroǵarysh ónerkásibi birinshi vıtse-mınıstri Baǵdat Mýsın aıtty, dep habarlaıdy QazAqparat tilshisi.

«Bıometrııa boıynsha qyzmet alýshylardyń Egov-ta bir qadam arqyly tirkelýin júzege asyrý ústindemiz. Bul qoldanýshylarǵa bıometrııalyq sáıkestendirýden ótip, kez kelgen qyzmetke qol qoıýǵa múmkindik beredi. Nátıjesinde, kóptegen adamdar egov qyzmetterin paıdalana alatyn bolady», - dedi ol.

Birinshi vıtse-mınıstrdiń sózine qaraǵanda, qyzmet alýshylar egov-ke tirkelgennen keıin qaǵaz qujattarymen qatar sandyq qujattar servısin qoldanýǵa múmkindik alady.

«Bul servıske jyl sońyna deıin kelesi qujattardy shyǵarý josparlanǵan: júrgizýshi kýáligi, avtokólik tehpasporty, sheteldik pasport, joǵary bilim týraly dıplom,stýdenttik bılet, saqtandyrý polısi jáne taǵy basqalary. Sondaı-aq, jyl sońyna deıin 30-ǵa jýyq joǵary suranysqa ıe anyqtamany alyp tastaımyz. Shynaıylyqty rastaý QR kodty oqý arqyly qamtamasyz etiledi», - dedi Baǵdat Mýsın.