Joǵary sot ókilderi aımaqtaǵy sot ókilderine alǵash ret qashyqtyqtan dáris berdi
ASTANA. 27 qańtar. QazAqparat /Aıdar Ospanalıev/ - Búgin Joǵarǵy sotta alǵash ret qylmystyq isterdi qaraýmen aınalysatyn oblystyq jáne oǵan teńestirilgen sot ókilderine beınekonferentsııalyq baılanysty paıdalaný arqyly qashyqtyqtan dáris berildi.
Atalmysh sharany Joǵarǵy sot tóraǵasy Musabek Álimbekov kirispe sózben ashty. Tóraǵa sózinde atalmysh júıeniń Memleket basshysy Nursultan Nazarbaevtyń sýdıalardyń V sezinde sot óndirisine ınnovatsııalyq tehnologııalardy keńinen engizý jónindegi mindetterdi júzege asyrý maqsatynda qolǵa alynyp otyrǵandyǵyn atap kórsetti. «Búgin biz qashyqtyqtan oqytý júıesiniń tanystyrylymyn ótkizgeli otyrmyz. Osyǵan qaraı qazir Joǵarǵy sotpen 17 oblystyq jáne olarǵa teńestirilgen sottar baılanysta otyr. Bolashaqta bul shara aıyna eki ret uıymdastyrylatyn bolady»,- dep atap kórsetti Joǵarǵy sot tóraǵasy.
Shara barysynda Joǵarǵy sottyń sýdıasy Ádil Quryqbaev aımaqtaǵy áriptesteri úshin «Jeke menshik qylmystarǵa qarsy (tonaý, qaraqshylyq) qylmystyq jaýapkershilik» atty taqyrypta lektsııa oqydy. Shara barysynda jýrnalıstermen suhbattasqan Joǵarǵy sottyń Qylmystyq isterdi qadaǵalaý alqasynyń tóraǵasy Aqyltaı Qasymovtyń aıtýynsha, 2009 jyldan bastap Joǵarǵy sotta sot ókilderine bilim berý strategııasy daıyndalyp, qazir sonyń negizinde tıisti sharalar atqarylýda.
«Onda sot ókilderine semınar, dóńgelek ústel otyrystary sııaqty túrli ádister negizinde bilim berý máselesi boıynsha barlyq sharalar qarastyrylǵan. Búgingi qashyqtyqtan oqytý sharasy da osy strategııadan týyndap otyr. Sýdıalardyń bilimin jetildirý - ýaqyt talap etip otyrǵan másele. Buryn biz qoldanyp kelgen Azamattyq kodekste 300-ge jýyq bap bar bolatyn. Al búgin osy kodekste myńǵa jýyq baptar bar. Ózge zańdardy qospaǵannyń ózinde tek baptardyń barlyǵyn jatqa bilý múmkin emes. Jumys barysynda olardyń árqaısysy boıynsha túsindirýdi qajet etetin túrli máseleler týyndaıdy. Sondyqtan biz úshin biliktilikti jetildirý mańyzdy», - dedi Joǵarǵy sot ókili.
