Joǵary sot keńesiniń tóraǵasy Prezıdenttiń kelisiminsiz qamaýǵa alynbaıdy – Zań jobasy

ASTANA. QazAqparat – Jasaǵan qylmysy aýyr nemese asa aýyr sanatqa jatpasa, Joǵary sot keńesiniń tóraǵasyn Prezıdenttiń kelisiminsiz ustap alýǵa, kúzetpen ustaýǵa, úıqamaqqa alýǵa nemese kúshtep ákelýge ruqsat berilmeıdi. Bul týraly Parlamenttiń qaraýyna engizilgen zań jobasynda jazylǵan, dep habarlaıdy QazAqparat tilshisi.

«Qylmys ornynda ustap alynǵan ne aýyr nemese asa aýyr qylmystar jasaǵan jaǵdaılardan basqa kezde, Keńes Tóraǵasyn óz ókilettigi merzimi ishinde Prezıdenttiń kelisiminsiz ustap alýǵa, kúzetpen ustaýǵa, úıqamaqqa alýǵa, kúshtep ákelýge, sot tártibimen qoldanylatyn ákimshilik jazalaý sharalaryn qoldanýǵa, qylmystyq jaýaptylyqqa tartýǵa bolmaıdy.

Sotqa deıingi tergep-tekserý QR Bas Prokýrorynyń kelisimimen ǵana jalǵastyrylýy múmkin. Keńes tóraǵasy qylmys ústinde ustap alynǵan ne aýyr nemese asa aýyr qylmys jasaýǵa daıyndalý nemese oqtalý faktisi anyqtalǵan ne ol aýyr nemese asa aýyr qylmys jasaǵan jaǵdaılarda, oǵan qatysty sotqa deıingi tergep-tekserý QR Bas Prokýrorynyń kelisimin alǵanǵa deıin, biraq 1 táýlik ishinde ony mindetti túrde habardar ete otyryp, jalǵastyrylýy múmkin. Atalǵan adamǵa qatysty arnaýly jedel-izdestirý is-sharalary men jasyryn tergeý áreketteri QR zańnamalyq aktilerinde kózdelgen tártippen júrgizilýi múmkin», - delingen jańa redaktsııada.

Qazirgi retteýshi zańnamada mundaı norma joq. Qujatqa qosymsha berilgen túsindirmede bul usynys Joǵary sot keńesi tóraǵasynyń mártebesin Joǵary sot múshelerimen teńestirý maqsatynda engizilip otyrǵany kórsetilgen.

«Joǵary Sot músheleriniń jartysy sýdıa bolyp tabylatyndyqtan jáne eshkimniń tıispeýi kepildiginiń bolýyna baılanysty túzetýde Joǵary Sot Keńesi Tóraǵasyna osyndaı eshkimniń tıispeýin bekitý usynylady», - dep túsindirme berilgen ózgeriske.