Joǵary Sot keńesi derbes mekeme bolyp qaıta qurylady
Zań jobasy sot júıesinde kadr jumysyn jetildirýge, sýdıalardyń táýelsizdigin arttyrýǵa, Joǵary Sot keńesiniń qyzmetin jańǵyrtýǵa baǵyttalady. Sýdıalar men otstavkadaǵy sýdıalardy, Ádilet mınıstri, Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy, bedeldi ǵalym-zańgerler men sheteldik sarapshylardy engizý esebinen Joǵary Sot keńesiniń quramy keńeıtiledi.
«Zań jobasy aıasynda Joǵary Sot keńesin derbes mekeme etip qaıta qurý jáne onyń kadrlyq ókilettikterin keńeıtý jolymen keńestiń quqyqtyq mártebesi ózgertý kózdeledi. Osyǵan baılanysty, Joǵarǵy Sot keńesiniń jeke apparatyn qurý qarastyrylady, bul qurylymnyń derbestigin kúsheıte túsedi degen sóz. Qujatta qamtylǵan jaǵymdy jańalyqtardyń biri Joǵarǵy Sot keńesiniń quramy zań negizinde bekitiledi. Onyń quramyna Joǵarǵy Sot Tóraǵasy, Senat pen Májilistiń tıisti turaqty komıtet tóraǵalary, Bas prokýror, Memlekettik qyzmet isteri jónindegi ýákiletti organnyń basshysy, Ádilet mınıstri kiredi», - dedi QR Joǵarǵy Sotynyń sýdıasy Aqyltaı Qasymov.
Onyń aıtýynsha, zań jobasyn qabyldaý sot bıligi korpýsyn qalyptastyrý máselesin túbegeıli ózgertýge septigin tıgizip, sýdıalarǵa qoıylatyn talaptardy qatańdata túsýge jol ashady. Bul rette zań jobasynda Joǵary Sot keńesi sottardy qalyptastyrý, sýdıalardyń táýelsizdigi men olarǵa eshkimniń tıispeý kepildikteri jóninde Prezıdenttiń konstıtýtsııalyq ókilettikterin qamtamasyz etý maqsatynda qurylatyn turaqty áreket etetin táýelsiz organ bolyp tabylady dep belgilengen. «Zań jobasy quqyqtyq memlekettiń zańdylyq, demokratııalyq, bılikti bólisý jáne basqa da prıntspterine zııanyn tıgizbeıdi. Bizdiń oıymyzsha, bul normalar sot júıesinde kadrlyq jumysty jetildirýge, sondaı-aq sýdıalardyń táýelsizdigin arttyrýǵa yqpal etedi», - dedi sýdıa Aqyltaı Qasymov.
Májilis maquldaǵan zań jobasy Senatqa joldanady.
