Joǵary shendi polıtsııa qyzmetkeriniń kóligine oq atqandar ustaldy
ALMATY OBLYSY. QazAqparat – Almaty oblysyndaǵy joǵary shendi polıtsııa qyzmetkeri otyrǵan kólikke oq atqan kúdiktiler ustaldy. Bul týraly Almaty oblystyq polıtsııa departamentiniń baspasóz qyzmetinen málim etti.
Vedomstvo aqparatyna sáıkes, osy jyldyń 26 maýsymynda, shamamen saǵat 12-00-de, «Almaty-Óskemen» avtojolynyń 143 shaqyrymynda belgisiz adam «Hyundai Santa FE» markaly avtomobıldiń salonynan qyzmettik kólikke oq atqan. Atalǵan qyzmettik kólikte Almaty oblystyq polıtsııa departamentiniń qyzmetkerleri bolǵan.
«Búgin PD qylmystyq polıtsııa departamentiniń qyzmetkerleri atalǵan qylmysqa qatysy bar kúdiktilerdiń barlyǵyn anyqtap, ustady. Olarǵa qatysty QR Qylmystyq kodeksiniń 24-babyn qoldana otyryp, 99-baptyń 2-tarmaǵy 1, 2, 7, 8-tarmaqshalarymen qylmystyq is qozǵady. Olardyń taǵy biri QR QK 28-baby 3-tarmaǵymen qylmysty uıymdastyrýshy retinde tanyldy. Qazirgi ýaqytta barlyǵy Almaty oblystyq tergeý oqshaýlaǵyshyna qamaýǵa alyndy», - dep atap ótedi departamentten.
Sonymen qatar polıtsııa departamenti kúdiktilerdiń biri polıtsııa qyzmetkeri bolǵan degen aqparatqa qatysty málimetpen bólisti.
«Atalǵan azamat polıtsııa qyzmetkeri emes. Óıtkeni, ol erterekte teris qylyqtary úshin ishki ister organdarynan qyzmetten shyǵarylǵan», - dep túsindirdi vedomstvodan.
