Joǵary shendi ofıtserler óziniń adaldyǵyn málimdep, qaramaǵyndaǵylardan sony talap etýi tıis
Otyrysta quqyq qorǵaý organdary jeke quramynyń sybaılas jemqorlyqqa qarsy zańnamany jáne Memlekettik qyzmetshilerdiń ádep kodeksin saqtaýy máseleleri qaraldy. Asanov Elbasynyń kásibı apparatty qalyptastyrý boıynsha reformasynyń mańyzdylyǵyna toqtaldy. Bul baǵytta quqyq qorǵaý organdarymen orasan zor jumystar júzege asyrylyp jatqanyn aıtty.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov quqyq qorǵaý júıesindegi júrgizilip jatqan reformalardan qoǵam úlken ózgerister kútetindigin atap ótti.
«Bir jaǵynan quqyq qorǵaýshylar qataryna joǵary deńgeıli kásibı mamandardyń túsýin qamtamasyz etý qajet. Ekinshi jaǵynan olar minsiz abyroıly bolýlary kerek. Olar konstıtýtsııalyq qurylys pen qoǵamdyq tártipti, qaýipsizdikti saqtaýdy qamtamasyz etýge mindetti jáne jemqorlyqtan taza bolyp azamattardyń senimin týdyrýlary tıis», - dedi Qojamjarov.
Agenttik tóraǵasy qazirgi ýaqytta osyny tolyǵymen júzege asyrýǵa álemdik tájirıbede beıimdelgen quraldar jetkilikti ekendigin atap ótti. Olar: polıgraf, kásibı jáne jeke bas biliktiligin anyqtaýǵa arnalǵan testter, sybaılas jemqorlyqqa qarsy shekteýler men mindettemeler, ishki qaýipsizdik bólimsheleriniń jumysy.
Sonymen birge Qojamjarov joǵary shendi ofıtserler qyzmet múddelerine satqyndyq jasaǵan mysaldardyń is júzinde bar ekenin atap ótti. Aýdandyq býynnan respýblıkalyq deńgeıdegi árbir basshyny óziniń adaldyǵy týraly málimdep, óz qaramaǵyndaǵy qyzmetkerlerden sony talap etýge shaqyrdy.
Otyrys qorytyndysy boıynsha tártipti nyǵaıtý, jeke quram arasynda sybaılas jemqorlyqty azaıtý jáne quqyq qorǵaý organdaryna halyqtyń senimin arttyrý maqsatyndaǵy Jol kartasy qabyldandy.
