Joǵary oqý oryndaryndaǵy tarıh oqýlyqtary bir júıege áli tolyq túsip bolǵan joq - Hankeldi Ábjanov
ALMATY. 24 mamyr. QazAqparat /Erlik Erjanuly/ - Qazir Bilim jáne ǵylym mınıstrliginde ár pán boıynsha bekitiligen baǵdarlamalardy júzege asyratyn oqýlyqtar jetkiliksiz.
Bul jaıynda Shoqan Ýálıhanov atyndaǵy tarıh jáne etnologııa ınstıtýtynyń dırektory Hankeldi Ábjanov búgin Almatyda ótken «Otan tarıhy jáne mádenı muralardyń ózekti máseleleri» dep atalatyn jas ǵalymdardyń ІІ Respýblıkalyq ǵylymı konferentsııasy kezinde aıtty.
«Qazir ult tarıhyna, Qazaqstan tarıhyna jańa kózqaras ornyǵyp jatyr. Bizdegi bir qıynshylyq oqýlyqpen qamtamasyz etý, ásirese memlekettik tildegi oqýlyqpen qamtamasyz etý bolyp otyr. Bul jumys óte kesheýildeýde. Ál-Farabı Qazaq ulttyq ýnıversıteti, Abaı atyndaǵy Qazaq ulttyq pedagogıkalyq ýnıversıteti sııaqty irgeli oqý oryndaryndaǵy muǵalimder jazǵan oqýlyqtar ondaǵy baspalardan shyǵyp jatyr. Al orta jáne aımaqtyq oqý oryndary Máskeýdiń shyǵarylǵanyn jáne Keńestik dáýirde basylǵan eski oqýlyqtard paıdalanady», - deıdi Hankeldi Mahmutuly. Onyń aıtýynsha, Reseı oqýlyǵy sol eldiń múddesi turǵysynan jazylǵan. Sondyqtan ol keı kezde ulttyq jáne memlekettik múddemen sáıkes kele bermeıdi. Bul olqylyqty túzetý maqsatynda qazir Bilim jáne ǵylym mınıstrligi respýblıkalyq keńes quryp, mektep oqýlyqtarynyń alǵashqy tolqynyn saraptamadan ótkizýde. Aldaǵy ýaqytta bul jumys odan ári jalǵaspaq. Qazir joǵary oqý oryndaryndaǵy tarıh oqýlyqtary bir júıege áli tolyq túsip bolǵan joq.
